ZALEN July 29, 2026 : Vawiinah khan Mizoram atanga Indian Football League khel club pahnih, Aizawl FC leh Chanmari FC te season liamtaa an senso tanpuina sum Sports Minister-in a hlan.

Mizoram sawrkar chuan Bana Kaih (Handholding) scheme hmangin club pahnihte hi a vawikhat nan cheng nuai 25 ve vein a tanpui a. April 16, 2026 khan installment hmasa cheng nuai 17.5 a hlan tawh a, vawiinah installment hnuhnung nuai 7.5 ve ve a hlan leh a ni.

Lalnghinglova Hmar chuan Mizoram sawrkarin infiammite bana kaih a ngaipawimawh tih a sawi a. “Football kaltlangin Mizo thalai tamtakin eizawnna an nei a, season liamta khan Indian Super League leh Indian Football League ah Mizoram player 100 chuang an tel. Hei hi player te leh an chhungte bakah a state pum ang pawhin kan hlawkpui pha a ni.” a ti a. 

Football leh sports discipline dangte chu thalaite hmasawnna thlentu pawimawh tak a nih avangin Bana Kaih scheme nen pawh a inhmeh a, pawisa hmanna awm tak a nih thu Minister chuan a sawi bawk.