ZALEN June 4, 2026: Mizoram State Sports Council buatsaihin vawiin khan Administrative Training Institute (ATI) Auditorium-ah 'Empoering Mizoram Sports (EMS)' Awareness Campaign for Corporators and Local Council' neih a nih a, he hun hi SYS Minister Lalnghinglova Hmar chuan a hmanpui.

Lalnghinglova Hmar chuan EMS-ah hian Archery, Badminton, Boxing, Judo, Hockey, Taekwondo, Weighlifting leh Wrestling te chu hmalakna hmasa tur a nih thu a sawi a, he programme hi India-in 2036-a Olympic Games a thlen tum thlir chunga hmalakna a nih thu a sawi a, hemi atan hian Aizawl khawpui chhunga Local Council te leh Ward tin Corporator te an tangkai thei hle tura a ngaih thu a sawi.

Sports Minister chuan Veng tin Local Council te chu EMS hnuaia sports discipline zingami hmangin an venga naupang talent nei tha te zawnchhuah leh kawhhmuh kawngah tangkai thei turah a ngaih thu a sawi a, Local Council te chu an veng naupang kum 8-15 inkarte talent hailan sak turin sports department chu koh theih reng anni a ti a, sports discipline pathum thleng an ko thei tih LC member te hi a hrilh. Coach hi Aizawl atanga diltu an la awm loh thu leh thingtlang lam atanga chuan dilna an hmuh nual tawh thu a sawi bawk.

Jeremy Lalrinnunga pawh an venga weightlifting coach in a talent a hmuchhuah sak avanga hetiang dinhmun hi thleng thei a nih thu Minister hian a sawi a, chuvangin Mizoram-a mihring tamna ber Aizawl-ah hian talent nei tha tak hmuchhuah tur an awm ngei a rinthu sawiin, Olympic Games 2036-ah India aiawh Mizoram-in an neih theih ngeina turin Local Council hruaitu kalkhawm te chu hmalakpui turin a sawm a ni.