Aizawl February 11, 2023: Vawiin khan Sports Minister Robert Romawia Royte,HPC Vice Chairman Lawmawma Tochhawng, MLA, Road & Infrastructure Board Vice Chairman Er H.Lalzirliana, MLA & Bamboo Development Board Vice Chairman Dr. K. Pachhunga, MLA te chuan Lengpui daia MSSC-REC Motorsports Racing Track siam hnathawh lai an en hova, Mizoram Motorsports Association hruaitute leh Lengpui VC & NGOs ten an tawiawm a ni.

MSSC Secretary John Tanpuia chuan he project atana sum nuai 750 chu REC-in an CSR Fund atanga pek anih thu sawiin SASCI atangin Rs 800 lakh chu sanction hmuh a ni bawk, tiin Racing track hi Km 2.17-a thui niin a zauh zawng chu 12 metres a ni a, international standard a siam tum a nih thu a sawi a. Tih changtlun zel tum anih thu a sawi bawk.

Sports Minister Robert Romawia Royte chuan, J. Lalhmingliana te chhungin Joseph Zosangliana Complex tia koh tak ram zau tak an donate avangin lawmthu a sawi. MSSC-REC Motorsports Racing Track Mizoram-in kan neih tur hi Eastern India-a a hmasaber tur a ni a, kan ram tan a hlut dawn em avangin Deptt Officer leh Contractor te pawhin theih tawp chhuah se a duh thu a sawi bawk. 

He huna tel ve Lawmawma Tochhawng MLA pawhin thu sawiin hun reilote chhunga nasa taka hnathawh a ni chu ropui a tih leh foreign rama awm tura ngaih Racing Track te CM Zoramthanga leh Sports Minister Robert Romawia Royte na chang hriatna avangin Mizo thalaite an vannei dawn a ni a ti.

Bialtu MLA Er H Lalzirliana pawhin a bial chhunga hmasawnna lian tham a awm thar leh tur chu lawmawm a tih thusawiin hnathawktuten chak taka an thawh zel a beisei thu a sawi bawk.