ZALEN, Sept., 21, 2024: Sports Minister Lalnghinglova (Tetea) Hmar chuan Inrinni tuk khan Mualpui, Aizawl-a sports infrastructure hrang hrangte tlawhin a dinhmun a enfiah.

Minister chuan Mualpui-a sports infrastructure-te chu Mizoram huap pawha a tha pawl a nih avangin tangkai thei ang bera hman a duh thu a sawi.

Rajiv Gandhi Stadium, R. Dengthuama Hall, Khelo India State Centre of Excellence, Mizoram State Sports Council (MSSC) Sports Hostel, R. Dengthuama Hall kawta open gym leh infrastructure dangte chu uluk taka enkawla infiamnain hma a sawn phah ngeina tura hman tangkai a pawimawh tih a sawi bawk.

Hmun hma hrang hrang an enho hnuah hian MSSC Sports Hostel-ah inkawmhona hun an hmang nghal a. Mualpui mai ni lo, Mizoram hmun hrang hranga sports infrastructure-te dinhmun leh hmasawnna tura thawh ngaite an sawiho a, hma lak tawh dante tar lan niin hma lak zel dan turte an ngaihtuahho bawk.

Minister hi Henry C. Lalrawnkima, Secretary, MSSC leh MSSC Land & Building Protection Committee member-ten an tawiawm.