Tun hnaia Odisha-a neih zawh tak, Asmita Khelo India Youth, Junior leh Senior Women’s League Zone A-a Mizoram tana medal latu ritchawi chak pahnih, Zosangzuali leh Cindy Lalparmawii te chu Zirtawpni khan Sports Secretary Lalramsanga Sailo, IRS chuan a pisaah lawmna hun a hmansak.

Keitum nula, Zosangzuali hian category pathum, junior-ah gold, youth leh senior-ah silver a la a. Kolasib Saidan nula, Cindy-i hian category pahnih, youth-ah silver leh junior-ah bronze medal a la ve thung.

Lalramsanga hian medal latute chu an hma lam kal zelna turah theihtawp chhuaha Mizo tihmingtha zel turin duhsakna a hlan.

Zosangzuali leh Cindy te hi Khelo India State Centre of Excellence (KISCE), Sports & Youth Services (SYS), Rajiv Gandhi Stadium Hostel-a awm lai niin coach Malsawma Khiangte, KISCE, SYS hnuaia zirlaite an ni a. Tun tum inelnaah hian coach ho hian Malsawmtluangi, Masseuse, KISCE te nen ritchawi chak pali an kal.

Lalramsanga pisaa lawmpuina hunah hian SYS-a hotute leh Mizoram Weightlifting Association (MWA) hruaituten an tel a. Mizoram team an kal theih nana sum buaipuisaktu Sports Secretary chungah Mizoram aiawhten lawmthu an hrilh.

Khelo India hnuaiah hian Zone A hi khawchhak lam state 13 - West Bengal, Jharkhand, Bihar, Chhatisgarh, Odisha leh hmarchhak state pariat an awm a. Tun tum inelnaah hian Youth, Junior leh Senior-ah Odisha vek an champion.