Zanin dar 9 hian Premier League-ah chmpion rinkai Chelsea chu Tottenham Hotspur mualah an leng lut dawn. London derby hi Blues ten champion zia an pu tak tak em tih leh Spurs tan an coach thar hi thlamuanpui tham a ni dawn em tih chianna game pawimawh a ni thei ang.

Tun season-ah Chelsea hian hneh loh an la tawng lova, chuvangin khualmual mah nise an hmelma hlun lakah hian tlawm an tum hauhin a rinawm loh. Tottenham erawh an league match hnuhnung berah Crystal Palace lakah an vanduai thung, Blues lakah hian tlawm nawn an tum bik hauh lovang le. 

Chelsea hian tun season-ah hneh loh an la neilo piah lamah thawhlehni khan Champions League group stage-ah Zenit chu si khat faiin an mual Stamford Bridge-ah an hneh a, an UCL title hum an duhna aiin PL trophy chawi an duhna hi a hniam bik hauhin a rinawm loh. Chutihrualin, Tottenham lah PL team tha pawl a sawi ni ngailo Crystal Palace laka si thum fai zet an phurh vang khan zanin hian mualpho nawn an tumin a rinawm lo. Wolves, Watford leh Manchester City te hneh thei Spurs an ni tih  theihnghilh chi a ni bik lo. 

Blues star ke rek na vanga chawl N'Golo Kante-a'n zanin hian a khelh theih hmel a, mahse Tuchel hian ke rek na vanga buai tho Christian Pulisic tel lovin team a set a la ngai dawn thung. "Christian Pulisic hian mahniin training a la mek a, a hma thei ang berin team training rawn zawm a tum a ni. Tunah rih chuan squad-ah kan telh rih lo. N’Golo erawh dam tha takin a rawn kir a, inkhel turin a inpeih a ni," tiin Chelsea boss Tuchel chuan a sawi. Thiago Silva leh Ben Chilwell te hian Zenit an hmachhawn tum khan mualah an inlan rei thei lo, zanin hi chuan hun rei deuh zawk an khelh theih a beiseiawm bawk. 

Tottenham thung hi an innghahna player pathum ngawt an tel thei dawn lo. Palace laka red card hmuh Japhet Tanganga chu a la  inlan thei dawn lova, Eric Dier leh Cristian Romero te pawh hliam vangin an tel thei dawn lo. Steven Bergwijn leh Lucas Moura te duhthu samin an fit tawk lo bakah Heung-min Son-a tel lovin Nuno hian London derby hi a hmachhawn a ngai dawn.