Premier League club Tottenham Hotspurs chuan India-ah an player hlui leh ambassador Osvaldo Ardiles leh Ledley King te tirin Thawhlehni khan kum thum chhung atan Bengaluru Super Division club Kickstart FC nen thawhhona tur thuthlung an ziak.

FA Cup champion lo ni tawh leh Premier League-a club che tha pawl tak, London club hian Indian club hnenah hian an coaching team hmangin training, curriculum leh football hmathlir lamah an pui dawn a ni.

“India-ah a vawi khat nan kan lo zin a, theihna ropui tak a awm tih kan rawn hmu a. He ramah hian talent a awm a, infrastructure pawh a awm a. India hi hei aia sang (next level) thleng tura puih kan duh a ni,” tiin England defender hlui, King chuan a sawi.

“Kickstart player-te hi London-ah lo zina kan rawlthar team nen training turin ka hruai ang a, youth team pawh an tum ang. England emaw, Europe-ah emaw pawh ni se, professional footballer ni turin eng ang chiah nge an dinhmun tih inhriatna tur remchang a ni dawn a. Indian player zingah Premier League, a bikin Tottenham Hotspur-a khelh tumna nei an awm teuh va, a tak a thlen chuan kan tan pawh a taka suangtuahna chang a ni dawn a ni,” a ti.

Argentine international hlui, 1978 World Cup-a an champion tuma tel, Ardiles pawhin Kickstart hmathlir chu tha a tih thu leh inkungkaihna nghet zawk an neih theih phahna tur pawh a nih thu a sawi.

“Kickstart-in hun reilo te chhunga grassroots football an tihmasawn dan hi pui tak a ni a, he kan inkungkaihna pawh hi thuk lehzual pawh a ni dawn a, coach tlem azawng an lo kala reilo te hun an hman ang kha a ni dawn lo, a chhan chu zirtirtu tha chu player tha pawh a ni tel a ni,” tiin Argentina tana vawi 51 khel tawh, Ardiles chuan a sawi.

Kickstart FC dintu leh an chairman ni mek, Shekhar Rajan pawhin an thawhhona chuan an club a tihthan ngei a rin thu a sawi a. “Tottenham-a kan naute thawn ngawt emaw, Indian team-a an khelh phak ngawt emaw kan tum a ni lo va, ram pawn thlenga khelhtir kan tum a ni. Tottenham atang hian kan zir dawn a ni,” a ti.