ZALEN, Jan. 8, 2025: Rajasthan-a Thawhlehni atanga Volleyball Federation of India (VFI) buatsaih, Senior National Volleyball Championship-ah Mizoram mipa team chuan Nilaini khan an khelh hnihnaah bul tan tha zawk, Nagaland chu lehthalin hnehna an chang.

A tan nia Pondicherry laka 3-1-a an tlawm hnuah Mizoram Volleyball Association (MVA) tirha Mizoram aiawha Jaipur khawpuia inkhelte hian Pool F-ah khelh hnihnaah hnehna an chang a, an hmarchhakpui lakah hian set hmasa ber hloh mah se hi 3-1 (20-25, 25-19, 25-15, 2)-in an lehthal a ni.

Team 34 telna championship-ahhian pool ruk awmin pool khata an awmpuite hi an inkhel kual dawn a, pool tina a sang pahnih theuh bakah pathumna zinga ti tha paliin round of 16 an lut ang.

Mizo tlangvalte hian Pool F-ah hian Pondicherry leh Nagaland bakah Chandigarh, Maharashtra, Delhi leh Andaman an awmpui a ni.

Thawhlehni tlaia Sawai Mansingh Stadium Court No. 2-a Pondicherry an hneh loh hnu leh Nilaini chhuna Indoor-a Nagaland an hneh hnu, Nilaini zan dar 8:00 khan Andaman an hmachhawn lehnghal dawn a ni.

Ningani zing dar 8:00-ah Court No. 1-ah Delhi hmachhawnin chawhnu dar 2:00-ah Court No. 1-ah vek Maharashtra nen an intum leh ang a, Zirtawpni zing dar 8:00-ah pool match hnuhnung ber chu Chandigarh nen an khel bawk ang.

Mizoram aiawha kal tur hian MVA chuan player 12 a thlang chhuak a, pahnih an theih loh tak avangin player 10 an ni ta a ni.

MIZORAM FIXTURE:

January 7, 2025 (3:00 pm) - Mizoram vs Pondicherry (1-3)

January 8, 2025 (12:00 pm) - Mizoram vs Nagaland (3-1)

January 8, 2025 (8:00 pm) - Andaman vs Mizoram (Indoor No. 2)

January 9, 2025 (8:00 am) - Delhi vs Mizoram (Court No. 1)

January 9, 2025 (8:00 pm) - Maharashtra vs Mizoram (Court No. 1)

January 10, 2025 (8:00 am) - Chandigarh vs Mizoram (Court No. 1)