ZALEN, Jan. 8, 2025: Rajasthan-a Senior National Volleyball Championship khelh mekah Mizoram mipa team chuan Nilaini zan khan Andaman & Nicobar Island chu 3-0-in an sawp a, khelh thumah vawi hnih an chak ta.

Sawai Mansingh Stadium Court No. 1-a Pool F inkhelah hian kawng engkimah Andaman hian Mizo tlangvalte hi an khan lo a ni ber a, ‘an sawp’ tiin a chiang ber.

Mizo tlangvalte hian tha taka bul an tan a, lehlam hian a vuak, a dan (block), service, ball chân leh lakah an khum vek a. Set khatnaah hian Andaman tlangvalten an service sual nasa chu an tuar a, set hnihna leh thumnaah pawh insiam tha thei lovin setter tana thain ball an la thei lo va, an block hleithei lo bawk.

Chhun lama Nagaland laka set khat hloh hnua insiam thaa lehthal thei Mizo tlangvalte hian hahdam takin 3-0 (25-16, 25-13, 25-13)-in hnehna an chang a ni.

Volleyball Federation of India (VFI) buatsaih, India rama volleyball inelna ngaihhlut hlawhah hian Mizoram hian Thawhlehnia inelna tan niah Pondicherry chu 3-1-in hneh lo nghal mah se Nilaini chhunah Nagaland chu 3-1-in an hneh a, zanah a aia chiangin an chak leh.

Mizoram Volleyball Association (MVA) tirha Mizoram aiawha Jaipur khawpuia inkhelte hian Pool F-ah khelh thumah vawi hnih an chak ta a. Team 34 telna championship-ah hian pool ruk awmin pool khata awmpuite hi an inkhel kual ang a, a sang pahnih theuh bakah pathumna zinga ti tha paliin round of 16 an lut ang.

Mizo tlangvalte hian Pool F-ah hian Pondicherry, Nagaland leh Andaman bakah Chandigarh, Maharashtra leh Delhi an awmpui a. Ningani zing dar 8:00 hian Delhi nen Court No. 1-ah an khel leh nghal dawn a ni.

Mizoram aiawha kal tur hian MVA chuan player 12 a thlang chhuak a, pahnih an theih loh tak avangin player 10 an ni ta a ni.

MIZORAM FIXTURE:

January 7, 2025 (3:00 pm) - Mizoram vs Pondicherry (1-3)

January 8, 2025 (12:00 pm) - Mizoram vs Nagaland (3-1)

January 8, 2025 (8:00 pm) - Andaman vs Mizoram (0-3)

January 9, 2025 (8:00 am) - Delhi vs Mizoram (Court No. 1)

January 9, 2025 (8:00 pm) - Maharashtra vs Mizoram (Court No. 1)

January 10, 2025 (8:00 am) - Chandigarh vs Mizoram (Court No. 1)