ZALEN, October 13, 2025: India rama hmeichhe cricket inelna sang, Senior Women’s T20 Trophy 2025 khelh mekah Thawhtanni khan Mizoram wicket rukin chuan Arunachal Pradesh nulate an hneh a, Plate Group-a team ruk awmah palina dinhmun hauh mekin khelh khat an la neihah final luh theihna tlem a la inhawng.

Board of Control for Cricket in India (BCCI) buatsaih, an hnuaia association-te tana hmeichhe inelnaah hian Mizo nulate hian khelh liah point riat hmu tawhin an chung chiaha awm, Nagaland nen an point hmuh zat a inang a. Meghalaya-in point 10 leh hmahruaitu, Sikkim-in point 12 an nei tawh.

Plate Group-ah hian a sang pahnihin Zirtawpniah final an khel dawn a. Nilainiah Mizoram leh Meghalaya an khel leh dawn a, Mizo nulate hi an chak chuan an lehpel daih thei a. Hetih rual hian Nagaland-in pangana hauh mektu, Manipur an hmachhawn ve dawn a, an chak ve tho a nih chuan an inkhelh tawhna result (net run rate)-in an dinhmun a hril thung dawn a ni.

Thawhtannia MBB Stadium, Agartala, Tripura-ah Plate Group inkhel vawi linaah Arunachal Pradesh hi thumvawrah chakin vuak hmasak an thlang a, opener Abhi chuan run 32 vaw chhuak mah se mi dangin an pui tha lo va, over 20 chhungin mi paruk thiin run 83 an tlin a. Mizoram tan Lalhriatpuii, Zothansangi, Jacinta Laltanpuii leh Shivangi Raj (outstation) ten wicket khat theuh an la. 

Mizoram vuak ve hunah hma takah wicket hmasa ber hloh mah se Lalrinfeli Pautu chuan run 16 a siam a, Palak Patel-i’n run 32 vaw chhuak bawkin over 18.5-ah mi pali thiin Arunachal nulate run siam an umpha a, hnehna an chang a ni. 

INKHEL KHAIKHAWMNA:

Arunachal Pradesh 83/6 (20 overs)

Shivangi Raj - 1/9 (4 overs)

Lalhriatpuii - 1/15 (4 overs)

Mizoram - 85/4 (18.5 overs)

Palak Patel - 32(46)

Lalrinfeli Pautu - 16(37)

Wicket 6-in Mizoram an chak