ZALEN, October 15, 2025: India rama hmeichhe cricket inelna sang, Senior Women’s T20 Trophy 2025 khelh mekah Mizoram chuan Nilaini khan run 12-a Meghalaya hnehin Plate Group-ah pathumna niin point inzat inangah net run rate (NRR)-a Nagaland an phak loh avangin final an lut thei ta lo.

Board of Control for Cricket in India (BCCI) buatsaih, an hnuaia association-te tana hmeichhe inelnaah hian Mizo nulate hian khelh ngaah vawi hnih chak, vawi khat tlawm leh result nei lo (no result) vawi hnih neiin point 12 an hmu.

Nagaland nen an point hmuh zat a inang chiah a, Mizoram hian NRR 0.083 an neih laiin anni hian 0.479 an nei a, tlema an phak loh avangin a sang pahnih final luh theih chu an phak ta lo va. Zirtawpnia final-ah an group-a a sang ber, Sikkim leh Naga nulaten final an khel ang.

Police Training Ground, Agartala, Tripura-a Nilainia an group inkhel hnuhnung berah Mizoram hi thumvawrah chakin vuak hmasak an thlang a. Palak Patel (outstation player) run 18 siam leh Lalrinfeli Pautu-in run 15 a vuak chhuah nen over 19.5-ah thi zovin run 74 an tlin.

Meghalaya hian chak nana an run mamawh an umnaah over 19.1-ah thi vekin run 62 an siam hram a, run 12-in Mizo nulaten hnehna an chang a ni.

Mizoram bowler, Bualpui nula, Sandhia Rai chuan over li a vawma mi pathum vawm hlumin run kua chiah an vuak chhuahsak, Player of the Match-ah thlan a ni.

INKHEL KHAIKHAWMNA:

Mizoram 74/10 (19.5 overs)

Palak Patel - 18 runs

Lalrinfeli Pautu - 15 runs

Meghalaya - 62/10 (19.1 overs)

Sandhia Rai - 3/9 (4 overs)

Jacinta Lalṭanpuii - 2/14 (2.1 overs) 

Run 12-in Mizoram an chak