Zirtawpni zan Hylo German Open Super 500 quarterfinal-ah India shuttler star world no.15 Kidambi Srikanth chuan a tumpui world no.9 nilai NG Ka Long Angus chu 21-11, 12-21, 21-19 a hnehin semi-final a lut. Semifinal-ah Lee Zii Jia, Malaysia a hmachhawn ang. 

Indian shuttler Kidambi Srikanth leh NG Ka Long Angus te pahnih semi-final luh inchuh inkhel hi a hmuhnawm hle a, darkar khat leh minute li zet a awh a ni. Seeded parukna Srikanth hian set khatna lain 21-11 in hnehna a chang. Set hnihnaah Angus-a'n tan rawn la vein 12-21 a hnehna rawn chang leh ve lehin deciding an khel a, khel tha zawk Srikanth chu 21-19 a chak zawkin semi-final a in vaw kai ta a ni. 

Player pahnih te hian inkhel an thunun hneh dun hle a, deciding match-ah hian Srikanth hian match point tum nga zet a nei hman chungin Angus hian a chelh hram thei zel a, a tawpah chuan world number one hlui Srikanth a chak ta zawk a ni. Tihian Srikanth leh Angus hi head to head ah tum thum ve ve chak record an nei chiah a ni. 

Quarter-final lehlamah Indian shuttler Lakshya Sen pawhin Thailand mi Kunlavut Vitidsarn chu 21-18, 12-21, 21-19 a hnehin semifinal a lut ve bawk a. Lakshya hian semi-final-ah Singapore shuttler Loh Kean Yew a hmachhawn ang.