Aizawl: Central YMA hnuaia ruihhlo dotu SRS (Supply Reduction Service) chuan Agust ni 4-24 ,2015 inkar chhung khian Art & Culture hmun, Berawtlang ah ruihhlo ngaite pualin Gospel Camping buatsaih an tum a, Synod lam nen an indawr mek. YMA thuneitu sang CEC rel angin Mizoram a ruihhlo hluar zel tur veng turin April ni 11,2015 atang khan SRS hian hna an thawk tan a, nimin thleng khan heroin hawng 38 leh can 222 an man tawh a. Ganja kg 4.1 bakah ruihhlo engemaw zat man tawhin he thila inhnamhnawih mihring 387 an man tawh bawk a, home ah 14 dahin Excise ah 11 leh Police ah 14 an pe tawh bawk. SRS hotute chuan ruihhlo kaihhnawiha an man te chu AIKO Councellor ten an nun an sim theihnan an pui thin nia sawiin an ngenna angin Synod Social Front Councellor ten an pui veleh tih an sawi a. Supply tih tlem chu an tum ber nia sawiin tun dinhmunah chuan a lo kalna ber Zokhawthar lam a ziawm hrih a, hmundang atanga a lo luh ringin an inralring reng tih Zalen an hrilh. SRS hotute chuan chhunzan zawma hna an thawh a ngaih thin vangin in lamah pawh an awm hman meuhlo niin an sawi a. Hna an thawh zelna turah mi thahnemngai ten sum leh pai hmanga an puih thin vangin an tan hnathawh a nuam sawt niin an sawi a. Nimin thleng khan mi thahnemngaite sum pek tlingkhawm hi Rs. nuai 1 chuang a tling tawh a ni.