Aizawl: Nimin zing dar 7:00 khan YMA hnuaia ruihhlo do pawl Supply Reduction Service 6th batch-in ni 24.2.2018 atanga ni 30.6.2018 inkar chhunga ruihhlo an man Rs. 91,52,310 chu Social Welfare Minister PC Lalthanliana chuan Central YMA office kawtah a halral. Ruihhlo halral puala inkhawm tawi buatsaihah thu sawiin Social Welfare Minister PC Lalthanliana chuan, “Ruihhlo zuarte hrem an nih theih nan sawrkarin dante a siam that bakah thalaite ruihhlo laka ven an nih theih nan zirlaiteah tanlak tum a ni,” tiin a sawi a. Central YMA President Vanlalruata pawhin thu sawiin ruihhlo do chu YMA tih tur a nih loh laiin a tul em avangin loh theih lohin an do tih a sawi bawk. SRS-te ruihhlo man halral tak hi heroin hawng 183, can 958, chhinsen 89, ganja 12kgs leh a dangte an ni a, hemi kaihhnawihah hian mihring 772 manin mi 40 home ah dah an ni a, Excise-ah 25 leh Police-ah 3 pek an niin mi 275 chu counselling pek an ni. SRS hian ruihhlo bakah rangkachak kg 13, Rs. 4,16,00,000 hu an man bawk a. 6th batch SRS-te thil man hlut zawng hi a vaiin Rs. 5,07,52,310.00 hu a ni.