Aizawl: Nimin zing khan Central YMA Office kawtah CYMA hnuaia ruihhlo do tura din ‘Supply Reduction Service (SRS)' te ruihhlo mankhawm, Rs. 19,16,-900 hu chu MKHC Chairman Rev. Lalrinmawia'n a halral. Ruihhlo halral hmaa inkhawm tawi buatsaih ah thu sawiin MKHC Chairman Rev. Lalrinmawia chuan YMA in ruihhlo do an chawlhsan laiin Home hrang hranga dah tur an tam tih sawiin kohhran chuan demand a tlem theihnan nasa takin hma a la tih a sawi bawk. Central YMA President Lalbiakzuala pawhin mipui auhna chhangin SRS chu dinthar a ni tih a sawi a. Sual do kawngah Pathian in SRS te mal a sawm tih sawiin, "Kan ramah chhanchhuah ngai tam tak an awm a, heng mite tan hian hma kan la zel dawn a. Mipuite tawiawmna leh finchhuahna kan ngen a ni," a ti. SRS Secretary RL Zomawia report atanga a lan danin April ni 11,2015 atanga June thla tawp thleng khan Heroin hawng 42, can 257.5, chhin sen 23, Alprazolam strip 386, ganja 4.200kgs, Meth mum 108,800 man a ni tawh a, heng an ruihhlo man hlutzawng hi Rs. 35,895,000 a ni a. Ruihhlo kaihhnawih ah hian mihring 476 manin home ah 31, Police leh Excise ah 14 ve ve pek an ni a, mi thahnemngaite thilpek tlingkhawm chu Rs.nuai 3 a tling tawh bawk. Nimin tuka halral tak ruihhlo hi a vaiin Rs. 19,16,900 man hu a ni. Central YMA leh Synod Social Front tangkawp chuan August ni 4-24,2015 inkar chhung khian Art & Culture hmun, Beraw tlangah Chhanchhuahna Camping a buatsaih dawn a, Speaker ah Lalsanglura Ralte (Sons of God Ministry) hman a ni dawn a, thupuiah 'Sim rawh u (Mathaia 4:17) hman a ni ang. Camp neih tur atan hian Organising Committee pawh din a ni tawh bawk.