Aizawl: MNF General Secretary leh MLA ni bawk Lalruatkima chuan, "SSA zirtirtu te hlawh tur hi SSA account ah a awm vek tawh a, zirtirtu ten tun thla chhung ngeia hlawh an lak theihnan hma kan la dawn a ni," a ti. Nimin khan Aizawl Press Club ah chanchinbumite kawmin Lalruatkima MLA chuan Mizoram SSA Mission hnuaia sum hman tur Rs 1441.31 lakhs chu Govt. of India chuan ni 29.09.2016 khan rawn pein ni 6.10.2016-ah State Project Director chuan sawrkarah proposed expenditure siamin, UPST leh PST-te thla hnih hlawh tur (Aug –Sept. 2016) Rs.1041.50 lakhs leh thawktu dangte thla khat hlawh tur atan Rs.342.4 lakhs leh State & District Office administrative cost atan Rs.57.41 lakhs avaiin Rs 1441.31 lakhs-a dil niin a sawi a. "UPS leh PS zirtirtu tan thla 2 hlawh a dil lai hian SSA thawktu dangte hlawh tur thla 1 an dilna chhan chu SSA Bank Account a sum awmsa atanga pek tum a nih thu Note-ah a inziah vang a ni a. Sawrkar laipuiin sum a rawn pek ang leh SPD in sum hmanna tur a ruahman angin ni 2.11.2016 khan Finance Department-chuan Rs.1441.31 lakhs hman an phalna an pe a, mahse thla khat (July) hlawh chauh SSA a thawktute hian an la ta a, engvanga August thla hlawh hi pelo nge an ni tih kan zawt a ni," tiin media te a hrilh. Lalruatkima chuan Mizoram sawrkar-in SSA zirtirtu thla khat hlawh a kawlsa vek tawh chu a rang thei ang bera pe turin MNF chuan sawrkar a phut tih sawiin, "Sum hi khawiah nge a awm tih sawichiang tur leh zirtirtu harsa tak takte hlawh hi vawi khat mah chheprelh sak tawh lo turin kan phut a ni," a ti bawk.