Aizawl March 23, 2023 : Mizoram SSA Teachers’ Association (MSSTA) General Conference vawi 3-na chu vawiin khan Chanmari YMA Hall, Aizawl-ah neih a ni a. School Education Minister Lalchhandama Ralte chuan he hun hi khuallian niin a hmanpui a, High Court-in SSA teacher te dah nghet tura thutlukna a siam angin hmalak a nih thu a sawi.

Minister chuan tunhnaia Gauhati High Court, Aizawl Bench-in MSSTA member te Mizoram sawrkara School Education department hnuaia primary leh middle school-a zirtirtu post ruaka dahnghet tura thutlukna a siam chungchang sawiin SSA hnuaia thawktute a theih ang ang a, a tahtawla dahngheh an nih theih nan hma an lak tawh thu leh sawrkarin recruitment thar a tih dawnin reservation siam sak turte pawhin rawtna an lo siam tawh tih a tarlang. 

Lalchhandama Ralte chuan High Court thutlukna pawh sawrkarin a dawn veleh dan angin Law & Judicial lamah zirchiang tura pek a nih thu leh anmahni lam pawhin uluk takin theihtawp chhuahin tan an la tih a sawi a, an tlanchhe dawn lo tiin, MSSTA member te bakah Samagra Shiksha hnuaia thawk midang pawh an ngaihtuah tel tih a sawi bawk.

MSSTA member kalkhawmte hnenah khuallian Lalchhandama Ralte chuan Mizoram sawrkarin MSSTA te hamthatna tur a ngai pawimawh a, School Education minister a nih hnuah pawh Samagra hnuaia zirtirtute hlawh tihpun sak an nih bakah medical allowance te, casual leave leh earned leave te siam sak an ni tawh tih a sawi.

Mizoram SSA Teachers’ Association hi March ni 29, 2016 khan din niin SSA hnuaia primary school leh middle school zirtirtute telin tunah hian member 1203 (Primary school teacher – 550, Middle school teacher – 653) an awm mek a. Sub-headquarters 8 (Lunglei, Champhai, Kolasib, Mamit, Serchhip, Khawzawl, Hnahthial leh Saitual) an nei a ni.