Aizawl; SSA hnuaia zirtirtu hna thawkte chuan thla 4 chhung, July, August, September leh October hlawh an la thei lo a, hlawh an lak tlai chhan hi sawrkar laipuiin a kalphung a thlak danglam vang niin SSA Project Director Lalhmachhuana chuan Zalen a hrilh. Zalen palaiin a kawm naah SSA Project Director chuan, "tunhma chuan central-in direct in sum hi kan account ah an rawn dah a, an dah hnu hian kan hmang nghal thei mai a. Mahse central in kalphung thlakin Mizoram sawrkar acoount ah an rawn dah tawh a, Assembly pawmpui a ngaih tawh avangin kan hnen a lo thlen nan pawh thil tih ngai engemaw zat a awm a, thiltih zung zung a harsa a ni," a ti. SSA Project Director chuan inthlan (election) a tam avangin model code of conduct hman a ni thin a, hei hian hnathawh a timuang thin niin a sawi bawk a, tuna hlawh an pe mumal theilo tihloh chu thildangah harsatna a neilo niin a sawi a. Zirtirtu hlawh an bat pawh a tahtawla an pek chhoh theih zel a beisei tih sawiin tunkar chho hian thla 1 hlawh chu an pe thei dawn niin a sawi bawk. Thudawn danin kumin SSA a Mizoram sum hman tur budget hi vaibelchhe 198 a ni a, budget 90% hi central tum tur a niin a dang 10% hi Mizoram sawrkar tum ve tur a ni a, kumin budget atang hian vbc.40 chu hmanzawh a ni tawh a, tunah hian vbc. 29 hman theih turin buaipui leh mek a ni.