Aizawl; Nimin khan Student Self Support Union (SSU) chuan I&PR Auditorium-ah General Assembly vawi 29-na rorel inkhawm an nei a, Zirlaiten ram pawn (foreign) a eizawnna an neih zel theih nan leh Tourism tihhmasawnna atan ‘Foreign Language Training Centre’ din tura sawrkar nawr an rel. Hei bakah SSU hian darkar bi a inhlawhna a taka kalpui a nih ngei theih nana hma la turin sorkar-ah thlen ni se an tih bakah Mizoram chhunga zirna in zawng zawngah zirlaiten an harsatna leh manganna an thlenna tur councellor ruat turin sorkarah ngen ni rawh se, tih te an rel. SSU General Assembly hi naktuk hian Vanapa Hall-ah chhunzawm a ni dawn a, LE&IT Minister Lalrinmawia Ralte chu khuallian a ni ang. He hunah hian zirlai chhuanawm, mahni zirna atana intodelh mi 3 thlan chhuahte hnenah Self-Support Award 2014 hlan a ni dawn bawk a ni.