Aizawl: July 2016 chhung hian State Transport Authority chu an thutkhawm hnaih bawr vel ah two wheeler taxi leh auto rickshaw dilna permit pekchhuah an tum niin thudawn a ni. Zalen palaiin a biak naah Transport Director Remmawia chuan department lamin Aizawl khawpui chhunga two wheeler leh Aizawl chhehvela auto rickshaw service tir tumin hma a la mek nia sawiin mahse thutawp siamtu tur chu State Transport Authority a ni tih a sawi a, STA in a remtih chuan service tir tum a ni tih a sawi. Transport department in ruahmanna a siam dan chuan two wheeler taxi hi a tlanchhuah tirh km 1 ah a chuanman hi Rs.10 a ni ang a, a hnu zelah Rs.5 a ni ang. Auto rickshaw hi a tlanchhuah tirh km khat ah Rs.20 a ni ang a, a hnu zelah km tinin Rs.10 a ni thung ang. Auto rickshaw hi Aizawl dai, chhim ah Melthum/ Saikhama-kawn thleng, Hmar lamah Durtlang Leitan, khawthlang lamah Chhangurkawn leh khawchhakah Thuampui thleng service tir phal a ni dawn a, khawpui ah chuan luh phal a ni lo ang. Two wheeler taxi hi engzat chiah nge permit pekchhuah tur bithliah a la awm lo a, stand an neih dawn leh dawn loh pawh tihchian a la ni lo bawk.