ZALEN Oct. 15, 2024; Mizoram Consumer’s Union chuan man chawia mipui phur lirthei ten State Transport Authority in a man bithliah zawm loa an pawl rate siam ang zawma an tlan thin chu mipui sum dik lo taka rawkna a ni an ti.

MCU chuan hemi chungchangah hian thuchhuah siamin, tun hnai chauh nilo tun hma atangin man chawia mipui phur lirthei ten sawrkarin chuan man a bithliah zawm duhlo in an pawl in chuan man an siam angin an tlan thin an ti a, hei hi dan pawisaklohna a ni tih sawiin, mipuite rawkna a ni an ti a, STA rate siam anga tlan tha duh lo te laka dan anga action lak mumal a awm thin loh avangin lirtheia sumdawngte an pawngpawrh zel thin a ni an ti.

Thuchhuahah ah chuan danin mipui dinhmun harsatna hrethiama sawrkarin lirthei chuan man a bithliah ang zawm hram hram turin an ngen tih sawiin, sawrkar pawh mipui tana ding an nih angin dan bawhchhetute lakah dan anga action la ngam turin an ngen tih an sawi bawk.

STA chuan March thla khan thuchhuah siamin man chawia mipui phur lirthei service, taxi, Autorickshaw leh Maxicab te chuan man a bithliah thar a, 2-Wheeler taxi chu km. 1-ah Rs. 30 niin, km 1 hnuah erawh km tinah Rs. 20 zel a ni ang. Taxi pangngai-ah km. 1-ah Rs. 55 niin, hemi hnuah km tinah Rs. 45 zel a ni ang a, Autorickshaw chuan man chu km 1-ah Rs. 35 niin, a hnu km tinah Rs. 25 zel a ni ang. Maxicab chu metal road a a tlanin, km 1-ah Rs. 3.50 leh metal road lo ah Rs. 4 a ni.