Aizawl: Science Teachers’ Association Mizoram (STAM) chuan Rajya Sabha MP K.Vanlalvena hmalakna lawmawm an ti. Campus dinna kawnga harsatna awm hrang hrangte sutkian thuai thuai a nih theih nana chak taka hma la turin STAM chuan thuneitute a ngen tih an tarlang bawk.

STAM chuan thuchhuah siamin parliament session neih mekah Rajya Sabha MP K. Vanlalvena’n NIT Mizoram Permanent Campus dinna tura forest clearance neih loh avanga hnathawh kal lai mek thawh chhunzawm a nih theih loh chungchang zawtin NIT, Mizoram hmasawnna tura hma ala chu STAM chuan lawmawm a ti hle tih an tar lang a. Engineering College pangngai ang ngawt ni lo, India sawrkarin a bik taka a enkawl, NIT hi tunah hian India ram pumah 31 chauh a awm. 

NIT Mizoram hi kum 2010 din ni mah se thuneituten an ngaih pawimawh tawk loh thin avangin a dinhmun hi a la tlabalin a din rualpuite a pha lo nasa hle a. Lengpuia an campus tur pawh a ram luah tur chin chungchangah buaina a awm avangin building sakna tur leh infrastructure hrang hrang siamna tur sum, cheng vaibelchhe tel teh meuh hman theih lovin hun rei tak a tang mek a, a uiawm takmeuh a ni tiin NIT tha neih hlutna leh pawimawhzia hi thuneitute leh mipui hian hriain, campus dinna kawnga harsatna awm hrang hrangte sutkian thuai thuai a nih theih nana chak taka hma la turin STAM chuan thuneitute a ngen tih an tar lang bawk.