Stamford-ah harhtharna chang mek Spurs an leng lut dawn
![](/storage/news/post/RuINkD9CUi3RdqaqKp2I81y9ursvA9rBVTH6hCQ5.jpg)
Premier League fixture zinga match enchakawm ber pakhat chu zanin dar 10 hian khelh a ni dawn. Bluse boss hlui nikum kum tawp lama club zawm thar Antonio Conte hnuaia harh tharna chang mek Tottenham chuan an inkhelh hnuhnung game li-a chak hmel hmuh loh vanga talbuai mek Chelsea an bu zawlah an luhchhuah dawn. Stamford Bridge-a London club pahnih inkhel tur hi a nep dawn lo.
Blues hian point 44 neiin table-ah pathumna an hauh mek a, zanina an hmachhawn tur panganaa awm mek Spurs aiin point 8 in an sang rih zawk.
Season bul tan tha Chelsea hian champion tumin han bei viau mahse tun hnaiah an che fuh hleithei lova, Premier League-a an game hnuhnung pasarih-ah tum khan chiah an chak a, an game hnuhnung pali-ah point thum chauh an hlawh chhuah bawk avangin mual pawm lamah pawh an buai chho tan mek.
Thomas Tuchel-a hote hian table hmahruaitu Man City chu point 12 ngawtin an phak tawh lova, an chet chhiat lai taka top 4 a lan phak ngei tum Tottenham an hmachhawn tur hi an vanduai ti pawiin a sawi theih awm e. Mahse, Blues hian Spurs hi an ngam ve ruai thung a, an inkhelh hnuhnung paliah chakna chang vekin an in hmachhawn hnuhnung ber tum nikum September thla a Tottenham Hotpur khelmual-ah pawh Spurs lam hi si thum faiin an tlawm a nih kha. England top flight bikah Spurs hian November 2018 hnu lamah Blues hi an la hneh leh lo.
Mahse, Conte-a hnuaiah Tottenham hian tlawm an hreh hle a, nilaini khan Leicester City nen game hmuhnawm tak khelin minute 95 a nih thlengin Spurs hi 2-1 an la chaklo zawk a, mahse hnual duh lo Conte-a pawl te hian minute 97 naah an siphurh an sut lek thei a ni.
Conte hian Stamford Bridge lamah eng nge tih tur a haiin a rinawm bik lo. Achhan chu kum 52 mi hian kum 2016-2018 inkar khan Blues hi lo enkawl tawh thinin Premier League leh FA Cup a lo chawipui tawh a ni. Spurs tan inhliam Son Heung-Min a lut thei dawn lova, Harry Kane erawh a inlan thei rin a ni.
Chelsea lam hi inhliam vanga chawl Trevor Chalobah leh Reece James ten training an rawn zawm tawh vangin an that phah tura rin an ni bawk. Khup zai vanga khel thei lo Chilwell, Covid-19 kai Christensen leh International duty vangin Edouard Mendy te erawh Blues hian an chhawr thei dawn lo thung. Spurs tan Eric Dier rawn kir thei mahse, Cristian Romero erawh chhawr theih ala ni lo thung ang.
Latest News & Chhiar Hlawh
-
1m | Sep 07, 2024
-
2m | Sep 07, 2024
-
1m | Sep 07, 2024
-
1m | Sep 07, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
3m | Sep 06, 2024
-
1m | Sep 06, 2024
-
1m | Sep 06, 2024
-
2m | Sep 06, 2024
-
1m | Sep 06, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 05, 2024
-
2m | Sep 05, 2024
-
1m | Sep 05, 2024
-
1m | Sep 05, 2024
-
1m | Sep 04, 2024