Aizawl: AH & Vety department chuan hun eng emaw chen state dang atanga vawk lak luh a khap hnuah vawk hrisel te chu lak luh a phal tawh.

Vawk natna chi khat African Swine Fever (ASF) hrileng vanga hun eng emaw chen Mizoram sawrkarin state dang atanga vawk lak luh a khap hnuah tun hnai khan ASF laka fihlimte chu lak luh a phal ta a, vawk la lut turte chuan ASF free area a ni tihchianna certificate an neih a ngai thung. AH & Vety department-in SOP thar a tihchhuahah chuan state dang atanga vawk la lut turte chuan Veterinary surveillance office emaw, check gate emaw paltlang chauha lak luh theih a ni a. Vety doctor-ten ran hrisel a ni tih an endik a, soundness certificate neite chauh lak luh phal niin Vety department-in permit a pekte tan chauh lak luh phal a ni bawk.

ZALEN zawhna chhangin AH & Vety department thawktute chuan African Swine Fever vanga vawk thi report an dawng tawh lo tih an sawi a. “Vawk natna, African Swine Fever leh PRRS te hi chuan min chamchilh reng tawh dawn a; mahse, a ziaawm niin kan hria a. Ni danga vawk thi ang report kha chu tun hnaiah chuan kan dawng tawh lo a ni,” an ti.

Hetih lai hian Mizoram chhim lam, Vathuampui velah chuan ui pul hri a leng niin an sawi a; mahse, heng ui pul hri hi chuan Aizawl lamah chuan ui vulhtuten vaccine an lak that avangin a hlauhawm lo turah an ngai tih Vety thawktute chuan an sawi bawk.