ZALEN February 13, 2026: State Day of Prayer Committee chuan a tum thum nan State Day of Prayer chu Mizoram-in state a hmuh ni champha pualin February 20, 2026 hian a buatsaih leh dawn a, February 16 leh 17, 2026 atang hian Lammual-ah a duh apiang tan chhunah tawngtaina hun an hmang dawn a ni.

February 18 atangin Lammual-ah Ram tana Chawnghei Tawngtaina hun State day ni thleng chhumlo chatlo in hman a ni dawn a, February 18 zan atangin thusawitu tha tak tak ten thu an insawi chhawk ang a, praise and worship hun te a awm ang a, a duh a piang tel turin mipuite an sawm a ni.

Heng bakah hian state day ni tak hian prayer walk hmun li (4) atang in neih tur a ni a. Sikulpuikawn/Mission veng, Vaivakawn, Chanmai leh Bethel lung/Chaltlang atang in Hnehna kawngzawh neih tura ruahman a ni a, Bethel Lung atanga chhuak tur te hi zing dar 9:00 atangin Lammual panin an chhuak dawn a, a dang zawng atang hi chuan zing dar 10:30-ah chhuah tur a ni. Hemi ni pual hian Two Wheeler Rally neih a ni dawn bawk. 

State Day of Prayer Committee chuan Ram tana tawngtai Ni tih hi Ram mipui thinlungah hian riak se an duh ber tih an sawi a. State Day of Prayer-in a tum ber chu Zoram mipuite, a ruala thinlung hmun khat pu a' Ram tana tawngtaina ni neih hi, a hlutna hriat a tha an ti a. Kohhran zawng zawng huap a nih thu an sawi a, politics nena sawi zawm an duh loh thu leh tupawh sawrkar se he ni hi hman zel an tum thu an sawi bawk.