Aizawl February 4, 2023: Vawiin khan BJP Spokesperson leh Chiarman, National Women Empowerment Commitee ni bawk, Dr Heena Vijay Kumar Gavit, MP chuan BJP Office-ah chanchinthar lakhawmtute a kawm a, Central chuan state ah eng pawh sawrkar se, an mamawh ang chu a pe zel niin a sawi.

Covid-19 pandemic hnua thil man sang chak lutukah sawrkar laipuiin hmalakna eng nge a neih tih zawhna chu Dr Heena Vijay Kumar Gavit chuan, Covid-19 len lai zawngin India chu mi te hlauhthawnpui a nih thu a sawi a, chuti chungin ram lian ho zingah a tuar lo ber zingami a nih thu a sawi. Hri a len tirh khan India chuan N-95 siamna pawh nei lo ni chungin thla rei lo te chhunga khawvel ram danga thawnchhuak theih a nih bakah hrileng avanga riltam vang thi an awm lo thu a sawi. Maharsahtra MP hian central chuan a mamawh te tan eng state pawh ni se, an mamawh tur a pe thin a ti a, tha taka sum kal hman chu state tih tur a nih thu leh a hmang tha chu an vannei mai niin a sawi. Covid-19 hnulamah pawh India ram chu ram dang te rin aia chetha a nih thu a sawi a, "Ngaihtuahna hmang, mipuite ngaihtuahtu hruaitu an awm chuan kawng a awm zel mai a ni," a ti.

BJP Spokesperson chuan India sawrkar chuan ram thang mek kan nihna atangin atanga ram dinhmun ngelnghet ni turin hmalam a pan mek a ti. India ram chu Agriculture-a innghat ram a nih angin hemi lamah hian sawrkar pawhin nasa takin hma an la mek a, loneitute puihna tur pawh tam tak budget tharah ruahman a nih thu te, Buhtun (Millet) lamah sawrkar chuan hma nasa takin a lak thu leh Khawvela Buhtun thar hnam ber a nihna atangin thawnchhuak hnem ber pawh nih a tum thu a sawi. India budget chu mipui dinhmun hrang hranga ding te tan hmasawnna a ni dawn, a ti.

Dr Heena Vijay Kumar Gavit chuan Modi sawrkar hnuaia Swatch Bharat kaltlangin vantlang zun Incrore 11.7 chuang siam a nih thu te, In nei lo crore 3.7 tan in sak sak an nih thu te, Kawlphetha lamah pawh tunhma lama eng la luh ngaih lohna khaw tam takah eng mi crore 2.9 hnenah pek a nih thu te, Thingtlang lamah pawh mi crore 80 chuangin hnianghnar zawkin tui an hmu tawh niin a sawi. Health lamah pawh hmalak mek a nih thu leh nursing college 100 chuang din turin hmalakna a kal mek niin a sawi a, khawpui lian sa ni lo tih hmasawnna tur te, Tourist hmun tihchangtlun mek a tin thu te, middle class tana tax pek tur tihhniam anih thu te a sawi bawk.

BJP Spokesperson chuan Central Sawrkar chuan state tin te hmasawnna a ngaihtuah a ti a, Northeast state te hman tur budget pawh tih pun anih thu sawiin State tin te hmasawnna chu sawrkar laipui duh dan a nih thu a sawi bawk.

Dr Heena Vijay Kumar Gavit chuan Mirethei-ten ei tur an tlak chham loh nan PM Garib Kalyan Anna Yojana hnuaiah kum khat dang, a thlawnin chaw lam chi sem a ni dawn tih sawiin hemi atana sum sen ngai, cheng vbch nuai 2 vel chu sawrkarin a tum ang, a ti a, chenna in nei lo-ten in an neih vek theihna tur scheme, Pradhan Mantri Awas Yojana atana sum ruahman chu zaa 66-a ti sangin cheng vbch 79,000 dah a ni, a ti a, mirethei, tan in-a tang, pawisa chawi tur emaw bail-na sum emaw neilote, sorkarin a  tul angin a tanpui ang a ti bawk.