Mizoram MLA inthlanpui, November ni 28,2018 a neih turah Mizoram pawna awm Mizoten vote thlak ve ngei an duh a, an tan ruahmanna siam nise an duh tih Zalen an hrilh. Mizoram pawna Mizo awm tamna ber Shillong-a Mizo hruaitu pakhat chuan, “Khua leh tui kan nih angin vote thlak ve ngei hi kan duh hle a, vote thlak tur chuan sum tam tak senga lo haw bakah ni tha eng emaw zat thulh a ngai thin a. Kan tan ruahmanna min siamsak turin thuneitute kan ngen thin a; mahse, ‘provision-ah a awm lo’ tiin min hnawl zel a. Postal ballot tala kan thlak theihna tur hi min ngaihtuahpui thei se kan duh hle a ni,” a ti a. Shillong khawpuiah hian Mizo zirlai ringawt pawh 5000 chuang an awm nia sawiin an harsatna tawh hi sutkian dan awmse a duh hle tih Zalen a hrilh bawk.   Guwahati-a Mizo hruaitu pakhat pawhin Mizoram House-ah vote thlakna bawm dah ve turin an dil thin nia sawiin Election department chuan an la tihlawhtling lo tih a sawi a. An kal velna senso tumsak dan a awm leh awm loh thuneitute an zawhin a awm theih loh thua chhangin ‘in duh leh nangmahni insengsoin haw mai rawh u’ an ti thin niin a sawi.   Zalen palaiin kum 2013 MLA inthlanpuia Tuikukten Tripura-a vote an thlak theih chhan zawhna chhangin Election department hotute chuan Home Ministry-in ‘notified voters’-ah a puan vang niin an sawi a. Kumin inthlanpuia Tuikukte vote thlakna hmun tur chu Election Commission of India thuneihna a ni tih sawiin engmah ECI lamin a la ti chiang lo niin Zalen an hrilh bawk.   Hetih lai hian state pawna awm zirlai pakhat chuan ram hruaitu thlannaah vote thlak ve theih a châk thu Zalen a hrilh a; mahse, tun dinhmunah chuan an tan tihngaihna a awm lo niin a sawi a. “Vote thlak tur chuan ni eng emaw zat class thulh a ngai a, chumai bakah kal velna senso a tam a. Zirlaite chu nu leh pate chawm kan ni bawk si nen kan tan tingaihna a vang hle a. Sawrkar hian ruahmanna eng emaw tak duang chhuak thei se ka duh hle a ni,” a ti bawk.   Mizoram electoral roll tihchhuah thar berah chuan Mizoram pumah voters 7.68.181 an awm a, hengte hi mipa 3,74,496 leh hmeichhia 3,93,685 an ni.