Aizawl: Forest Department chhinchhiah danin sawrkar kum liamta 2015-16 chhung khan state pawnah hmun-phiah Rs. 42,69,470 man hu hralhchhuah a ni. Forest Department hotute hnen atanga Zalen palai thudawn danin Hmunphiah hralhna rate hi hmun hrang hrangah inang vek lo mahse a tlangpuiin Kg khat Rs. 30 vela hralh a ni tlangpui a, nikum chhung khan dan hnuaiah hmunphiah Quintal 15,564 hralhchhuah niin, hei hi Rs. 34,61,320 man a ni a, hei bakah hian phalna nei lo Forest Deptt.-in a man khawm Quintal 1338 chu Rs. 8,08,150 in hralh a ni bawk a, a vaia hmunphiah hralhna man chu Rs. 42,69,470 a ni. Forest department hotuten Zalen an hrilh danin State pawna hmunphiah hralhchhuah turte hi Mahal a ni lo a, Forest Reserved Area leh vantlang rama awmte chu a bialtu Forest Division ten lilamin a chhang huai ber hnenah pek a ni a, hmunphiah lilam chhangtu awm lohnaah chuan hmunphiah ro Kg. 1 zelah Royalty Rs. 7 lak a ni a. Mi mal huana hmunphiah chu royalty la lovin, Kg. 1 zelah Administrative charge cheng 1 lak a ni a, State pawna thawn chhuak turin Transit Pass pek thin a ni tih an sawi. Hnam Chhantu Pawl pawhin hmunphiah hi kum 1997 atang khan a lei tan a. Hmunphiah hi chi hrang hrang pangaah siam chhuakin, India ram State dang mai bakah Foreign thlengin an thawn chhuak mek a. Hnam Chhantu Pawl chuan an pawlin hmunphiah an lei ve atang hian State pawn atanga hnam dangin hmunphiah man an duh duha an ti danglam thin chu a veng nia sawiin, kut hnathawktuten man man zawkin an hmunphiah tharte an hralh theih phah niin an sawi a. Kum 2012 khan hmunphiah man chu Kg. khat Rs. 25 a ni a, kumin-ah chuan Silchar-ah Rs. 115 leh Vairengteah Rs. 90 ten a hralh thei tih an sawi. Zalen palai zawhna chhangin Hnam Chhantu President Ramhmangaiha chuan hmunphiah chu eizawnna tlak a nih thu sawiin, eizawnna tlak a ni tih chu tlangaupui in kawng hial an lo zawh pui tawh thu a sawi a. An pawl hnena hmunphiah hralhtu thenkhat chuan hmunphiah an hralhna atangin in leh lo an din hial tawh thute an hnenah an sawi thin thu Zalen palai a hrilh a. Hmunphiah chin mai bakah a hnu leha sawngbawl thiamna kawngah thalaite tun aiin thangharh leh zual se a duh thu sawiin, ti tak tak peih tan chuan sum chang thlai tha tak a nih thu a sawi a. Hnam Chhantu Pawl hian Mizoram khaw hrang hrangah hmunphiah siam dan zirtirna an neih bakah State pawn Meghalaya leh Assam-ah te zirtirna pe in an lo chhuah tawh thin thu Ramhmangaiha chuan Zalen a hrilh bawk.