Aizawl: Chief Minister Lal Thanhawla chuan sawrkar laipuiin kawng tinrengah state te a tanpui leh chhawmdawl a ngai tih a sawi. Nimin New Delhi a Inter State Council meeting vawi 11-na ah he thu hi sawiin Chief Minister chuan khua leh tui dik tak te chauhin Aadhar number an nei tur a ni tiin fimkhur tul a tih thu a sawi a. Mizoram a Aadhar card pek chhuah chu a muan thu sawiin Central in Aadhar pekchhuahna atan a rawih agency ten thil an ngaihzam vang a ni, a ti a. Direct Benefit Transfer tha taka mitin thleng phak turin internet inthlunzawmna leh thingtlanga bank te inzarpharhna lamah abika hmalak a tul thu a sawi bawk. Hmarchhak biala thiamna bik (skill) nei chu 5% chauh an nih thu leh kum 15-29 inkar mi za zelah 40 vel hna nei lo nia sawiin, "Skill Development hi ngaihpawimawh zual bik a tul a, hei hian industry leh private sector awmlohna tia sawi theih hmarchhak biala thalai tam tak tan an mahni ke a dinga, an mahni puala eizawnna kawng a hawn sak thei a ni," a ti. Ram venhimna chungchang sawiin Chief Minister chuan sakhaw lama firfiaknate, sum leh pai dinhmun a hnufual bikna, mi thenkhat ten ngaihsak loh bik nia an inhriatna te, thalai te tan eizawnna leh remchanna awm lo lutuk te leh hmun thenkhata ram leilung fate dinhmun derthawng mekte hi tharum leh buaina chhuah tamna chhan ber ani, a ti a. Tunhnaia Bangladesh a mifirfiakte chetna chu hmarchhak pum tan a hlauhthawmawm thei tih sawiin Central sawrkar chu hmarchhak state te tan za a za, 100 percent grant angin a hranpa ruahmanna separate package siam se a duh thu a sawi bawk.