An inbân hnua thawm mawi lo tak nei zui, Igor Stimac leh amah chhawrtu, All India Football Federation (AIFF) chuan inremna an nei thei ta a, India football thuneitu sang hian an coach hlui hi a contract an tihtawpsak avangin zangnadawmna US $ 400,000 (Rs Vaibelchhe 3.36 vel) a pe dawn.

Tar lan tawh thin angin AIFF hian Stimac-a hi June thla khan a bân a, a contract neih lai hmang zo turin kum khat vel hun a la nei a. India hian FIFA World Cup Qualifiers second round-a tumpui nem deuh tur nia lang laka result tha a neihpui loh hnu lawkah Croatian coach hi an bân a ni.

Coach leh a chhawrtu hi an inbân hnuah tawngkam mawi vak lovin an inbei zui a, Stimac-a hian AIFF-in a laka bat an neih chu ni 10 chhunga an tlak lo a nih chuan thui zawk thlen zel a tum thu hial pawh a sawi a; mahse, tunah chuan an inrem thei ta.

“AIFF hotu sangte chuan inrem lohna awmte chin fel a nih theih nan zangnadawmna US $ 4,00,000 pek chu an pawm ta a ni,” tiin Pathianni khan he an buaina hre chiangtu pakhat chuan PTI a hrilh.

Hetiang zat zet ruahman lawk loh sum kal tur hi federation pawhin a buai phah thei dawn a, competitions budget a ruahman sa chu a tihtlem phah a ngai dawn nia sawi a ni hial.

Inremna an neih hma hian AIFF hian thla thum hlawh pea inremna neihpui atan Stimac hi an dawr a; mahse, Croatian coach hi lungawi zo lovin thla hmasa khan FIFA hnenah a zualko va, kum hnih hlawh, US $ 9,20,000 (Rs Vaibelchhe 7.72 vel) pe tura nawrpui turin a a thlen.

Kum 57 mi, Stimac-a hi kum 2019 atangin AIFF nen hian an inchhawr tan a, nikum October khan kum 2026 thleng atan contract an pawt sei.

An inremnaah hian Stimac-a hian India hi Asian Cup quarterfinals a luhpui chuan a contract a ziah belh thei dawn tiin inremna an nei sa bawk a; mahse, hei hi a thlenpui zo lo.

India hi he inelnaa a inlan hnuhnung pahnih, kum 2011 leh 2015 kha chuan group stage-ah tlain a mawngphah ve ve a ni bawk.

Stimac-a hi tunah chuan Manolo Marquez-a’n a thlak tawh a. India coach hlui hian AIFF nen an inrem loh chhung khan thla nga hlawh peka a hnua thla 10 dang hlawk pek leh tura dawrna pawh a lo hnawl tawh a ni.