Kumin kum chanve hnu lam vel atang khan India tana khel tur football team puan a nih apianga social media-a thunawn langsar ber pakhat chu, “Khawnge Apuia?” tih a ni thin a, Mizo tlangval hian Igor Stimac-a squad-ah hmun a chang hlei thei rih lo.

Indian Super League (ISL)-a captain naupang ber ni thei, Lalengmawia ‘Apuia’ Ralte ngei pawhin a chhan a hre bik lo va; mahse, engtikah emaw chuan India kawr haa khelmual luh leh ngei a inbeisei tih a sawi.

Tun hnaia Sportskeeda-in an kawmnaah India team-a a tel loh chungchang hi an zawt a. “A chhan dik tak hi ka hre bik lo,” a ti a. “Coach thutlukna a ni a, kei aia tha an awmah a ngai a, a duhthlanna a ni a, engmah sawi theih ka ei lo, coach thu thu a ni,” a ti.

ISL-a Mumbai City tana khel mek hian Harry Maguire pawh Manchester United khel ngai lo mah se Gareth Southgate chuan England tana khel turin a thlang zel tho tih sawiin, “Coach thutlukna vek a ni a, hetiang hi chu football-ah thil thar a ni lem lo,” a ti.

September thla tira Thailand-a King’s Cup-a a khelh phak loh hnuah khan Stimac-a nen inbiakna remchang an nei tawh em tih zawhna chu, “Nei lo. Ka tan coach biaka engvanga koh ve loh nge ka nih tih zawh chu a dik lo. National team-a tel tur ka nih thu sawi theihna ka nei lo va, a game plan a ni a, min telh lo a nih chuan eng nge ka sawi theih chuan ang?” a ti.

King’s Cup khelh dawn khan Apuia hi a tira koh (probable squad) zingah a tel a; mahse, zin chhuak tak tak zingah erawh a tel zui ta lo thung.

Eng emaw laia India tana midfielder pawimawh tak ni thin, tuna khel phak ta lova a thiante khel lai in atanga lo en chu hrehawm a ti thin em tih zawhna chu, “Keimah hi chuan national team-a tela ka theih ang tawka team puih pawh ka duh a; mahse, coach thutlukna ka pawm a ngai a. Mumbai-ah ngei pawh min mamawh loh hun a la awm thei a, ka pawm a ngai a ni mai,” a ti.

India kawr haa khelmuala luh leh ngei a beisei thu pawh sawiin, “Remchang a awma coach-in min koh phawt chuan engvangin nge ka khelh loh ang?” a ti a. “Hei hi ka ram neihchhun a ni a, ram dang tan ka khel thei hleinem,” tiin nui chungin a sawi zui bawk.

Apuia hi kum ruk kal ta, U-17 World Cup-ah khan India tan inlanin kha ta tang khan hmabak nei êng ber pawla ngaih a ni a. NE United atangin kum 2021 nipui laiin Mumbai City FC a zawm a, kum 23 mi hian hma a sawn chak hle.

Mumbai-ah hian Des Buckingham-a kaihhruaina hnuaiah goal nawr lamah taltir tam hret a ni a, goal pawh a thun zui ta fo reng a ni.

Aizawl tlangval hi India-in midfield-a a neih hlu ber pakhatah insiam lian mah se mah se ram tan erawh June 9-a Intercontinental Cup-a Mongolia an hmachhawn hnuah a inlan phak zui tawh lo thung.

SAFF Championship-ah Stimac-a team-ah tel phak lovin King’s Cup-ah a tel lo zui leh.

Hei mai a ni lo va, Dalian, China-a AFC Under-23 Asian Cup qualifier khelh turah a kum leh a taksa fit-nain tlin mah se a tel lo leh a. Tun hnai lawka China-a Asian Games khelh tura India aiawhtute zingah a tel lo leh bawk.

Coach Stimac-a’n heti taka India tana khel tura Mizo tlangval a koh duh loh chungchangah hian September thla laihawl khan India ram chanchinbu lian, Times of India meuh pawhin titi siam hatin a lo a ziak tawh a. A tel loh chhan hi All India Football Federation (AIFF) pawhin a chhang thei lo/duh lo nia sawi a ni.

Titi leh sawi dan langsar tak awmah phei chuan May thla daih tawha Intercontineltal Cup khelh dawna Bhubaneswar, Odisha-a inbuatsaihna camp an neih laia team psychologist leh Stimac te nena an inhnialna avanga inmil lohna nghawng niin an sawi hial a ni.

Kum 2020-a kum 20 mi lek a nih laia North East United captain ni thei, Apuia erawh chuan Sportskeeda-in a kawmnaah hian chutiang chu a sawi lo va, remchang a neih phawt chuan India tana khelh leh ngei erawh a tum a ni.