January 12 leh February 10, 2024 inkara Qatar-a AFC Asian Cup an khelh turah Indian head coach Igor Stimac chuan a khel tura thlan chhuah leh turin player 50 a ko chhin a, Mizo pali an tel.

Stimac-a’n probable squad a puana hming langte hi Thawhlehni chhun khan X-ah pho chhuah an ni a. Goalkeeper panga leh defender, midfielder leh forward 15 theuh an tel.

Mizo player pali lang zingah Stimac-a pawhin a hman thiam sa pathum - defender Lalchungnunga, midfielder Lalengmawia (Apuia) Ralte leh Lallianzuala Chhangte ten hmun an chan leh bakah Indian Super League-a Odisha FC forward Jerry Mawihmingthanga a tel thar bawk.

East Bengal defender Chungnunga leh Chennaiyin FC winger Lianzuala bik hi Stimac-a team-ah an mikhual lo va; Apuia pawh hun eng emaw ti lai khan ‘boss-in a koh duh loh avanga inhnialna’ awm hman kha ni mah se tunah chuan India innghahna a ni leh tawh.

Kum 26 mi, Jerry-a hi tun season ISL-ah vawi sarih khelhah goal hnih a thun tawh a. India tan hian Under 19 leh 23-ah a lo khel tawh thin bawk.

Blue Tigers hi Asian Cup an khelh turah hian Group B-ah awmin January 13-ah Australia an hmachhawn hmasa ber ang a. January 18-ah Uzbekistan leh 23-ah Syria an hmachhawn zui ang.

Asian Cup-ah hian group paruka a sang ber leh a dawttu theuh bakah group-a pathumna titha paliin round of 16 an lut thei dawn a ni.

India team hi December 30 atangin a camp ang a, Doha-ah inelnaa inlan turin an kal zui ang.

Probables list

GOALKEEPERS: Gurpreet Singh Sandhu, Amrinder Singh, Vishal Kaith, Dheeraj Singh Moirangthem, Gurmeet Singh Chahal.

DEFENDERS: Naorem Roshan Singh, Bikash Yumnam, Lalchungnunga, Sandesh Jhingan, Nikhil Poojary, Chinglensana Singh, Pritam Kotal, Hormipam Ruivah, Subhasish Bose, Asish Rai, Akash Mishra, Mehtab Singh, Rahul Bheke, Narender Gahlot, Amey Ranawade.

MIDFIELDERS: Suresh Singh Wangjam, Rohit Kumar, Brandon Fernandes, Udanta Singh Kumam, Yasir Mohammad, Jeakson Singh Thounaojam, Anirudh Thapa, Sahal Abdul Samad, Glan Martins, Liston Colaco, Deepak Tangri, Lalengmawia Ralte, Vinit Rai, Ninthoinganba Meetei, Naorem Mahesh Singh.

FORWARDS: Sunil Chhetri, Rahim Ali, Farukh Choudhary, Nandhakumar Sekar, Siva Sakthi Narayanan, Rahul KP, Ishan Pandita, Manvir Singh, Kiyan Nassiri, Lallianzuala Chhangte, Gurkirat Singh, Vikram Partap Singh, Bipin Singh Thounaojam, Parthib Gogoi, Jerry Mawihmingthanga.