ZALEN, 27th Dec, 2025: K Sapdanga, Home Minister chuan Krismas urlawk ni a St. Mary’s School, Panigaon, Nalbari District, Assam a misualte'n bungrua an suasam chu a dem thu thuchhuah siamin 'democracy ramah hetiang thil tih hian hmun a chang tur a ni lo,' tiin a sawi.

A thuchhuah siamah chuan, "St. Mary’s School, Panigaon, Nalbari District, Assam-a thil thleng hi ka dem takzet a, a ngaimawhawm ka tih bakah a lungchhiat thlak ka ti bawk a ni," tiin tarlan a ni a. Kristian-te Hunpui urlawk ni a hetiang thleng hi Secularism kalh a ni a, democracy ramah hetiang thil tih hian hmun a chang tur a ni lo a, na taka dem tur a nih thu tarlan a ni bawk. 

"Krismas chu mitin tan remna, induhsakna leh inlainatna hun a ni a, communal harmony ti chhe zawng leh Kristiante hlauh tura chetlakna hi pawm zam chi a ni lo ang," a ti bawk.

Home Minister chuan Assam thuneitute'n pawikhawihtute an man tawh chu lawmawm tih thu a sawi a, dan angin an chungthu rel ni se a ti bawk.

Misualte hian December ni 24, chawhnu 2:30 khan zirlai 1000 awmna St. Mary's School hi luhchilhin sikul principal chu hmuh an tum a. Anni hi DC-ah thukhawm pawimawh neia a kal lai anih avangin an phone thei lo a. Misualte chuan thil intar, banner lian, LED bulb leh thil dangte an tichhia a, an aurual bawk niin Catholic Connect chuan an website-ah a tarlang a ni.