• Bakvawmte pu
• Food, Civil Supplies & Consumers Affairs Department hnuaiah Storekeeper posts 10 lakna tura Personal Interview chu ni 24th & 25th June, 2020 khan Commissioner & Secretary Chamber, FCS&CA, Room No -144, Mizoram New Capital Complex(MINECO), Aizawlah neih a ni a, Written-a tling mi 27-in Personal Interview hi an hmachhawn turah ka ngai. A tirah he hna lak chungchang hi ka lo hre vak lo a, thiante ka atanga ka hriat rualin FCS&CA site kan en nghal a, ni 5th June 2020-ah Written Exam Result tihchhuah a ni tih ka han hre ve chauh a, an site kan en thla zel a, Storekeeper lakna tur a pawimawh tak mai Corrigendum a lo awm kalh mai bawk a, chu pawh chu kan en leh ta zel a, hetiang hian a lo inziak a -

CORRIGENDUM
Food, Civil Supplies & Consumer Affairs Department Advertisement No 1 of 2019 - 2020 hnuai a Corrigendum vide memo No A.32011/7/2019-DTE(SPY)Estt./42 dt 29.9.2019 a tarlan angin Storekeeper posts 10(sawm) lak tur a post 1(pakhat) hi Persons with Benchmark Disabilities (Deaf & heard of hearing) quota atan reserved a ni a,. Hemi bak un-reserved quota 9 (pakua) atan hian Written Exam a mark hmu sang zual Candidate 19(sawmpakua) personal Interview turin koh an ni ang.

Sd/- Dr. LALHRIATZUALI RALTE
Director
Food Civil Supplies & Consumer Affairs
Treasury Square, Aizawl : Mizoram

Memo No. A.32011/7/2019-DTE(SPY)Estt./ : Dated Aizawl, the 29th November, 2020 tiin a lo inziak kalh a, Storekeeper hna lak turah written exam-a titha mi 19 koh tur ni siin engatinge mi 27 (sawmhnih pasarih) koh an nih leh tak daihna chhan ni ang aw tiin ka ngaihtuahna a kal nghal a, dt 29th November, 2020-a Corrigendum an siam hnuah hian Corrigendum dang an siam leh nge kan hre ta hauh lo mai a, an site ka en hian ka hmu tawh bawk si lo a. Duhsak bik koh belh an awm emaw ni tih palh pawh a awl dawn hle mai. Nge written Exam-a tling mi 27-te hi an mark a inang thup zawk ni? Department hian lehkha lah an site lamah an upload tha tluantling lo nge, sipai bang ka bo map mai. Personal Interview tura tling mi 19 (sawmpakua) hi Corrigendum an siam anga un-reserved quota posts 9 (pakua) tan a koh ni ta se, mi 8 la awm ho hi pianphunga rualbanlo-te an ni tihna a ni a, post 1 (pakhat) atan hetiang zat koh thu a awm bawk si lo. Dik lo leh felhlel deuh chu a awm a ni lo maw tih hi mipui zawhna a ni.

Personal Interview Result: MPSC hian hna alak reng reng hian Personal Interview result hi an zawh ni tlaiah a tichhuak nghal zel a, mipui pawhin kan rin phah. Hna lak Interview result hi naupang exam result chhuah ang a nih tawh loh avang leh tihchhuah harsa ni pawha a lan loh avangin MPSC hna lak chhuhsak nual a ni pawh thalai tam tak an ngui nghal vek ti ila kan sawi sual lo ang. Tunah department hna lak an awm leh ta a, result tihchhuah nghal hi a harsa viau nge, endik dan tur leh mark pek dan tur a buaithlak viau zawk ni? Sikul naupang exam result siam anga siam hun duh rei a ni zawk nge Hnam Rûn list siam a ngai leh tawh zawk? Result inup rei chi a awm leh fo dawn a nih ai chuan Mizoram sawrkar hian hna la tur hian MPSC hi ring tawk se kan va ti em. FCS&CA Department hnuaia mi 27 Personal Interview Result pawh hi tihchhuah harsa turah a lang lo. Hmun leh hmunah mark engkim an lo pe nghal vek dawn a, a inup rei leh viau a nih chuan he sawrkarah hian thalai hna zawng tam tak, dik tak leh rinawm taka titute an beidawng viau ang.

Sawrkar hian Department kaltlangin eng hna pawh la se, Interview Result hi tichhuak nghal zel tawh rawh se tih hi keini thalaite ngenna a ni e.