Manipur nula Femina Miss India 2023, 2nd Runner-Up Thounaojam Strela Luwang chu chi leh chi inkara buaina chawk chhuak thei zawnga post siamah puh a ni a, mahse hei hi thu dik lo a ni a - a Twitter account pawh suspend a ni lo niin Ukhrul Times chuan an tarlang.

Tun hnai khan Strela Luwang Twitter account suspend chungchang hi social media lamah thehdarh a ni a, a viral chiam a ni. Kum 21 mi Twitter account hi suspend a ni lo a, a hminga fake account siamtute chetna zawk a ni.

Strela Luwang chuan a hminga Twitter account siam an awm thu notification a dawng tih sawiin, hei hi an state-in buaina an tawh mek denchhena mi tute emaw hmalakna a nih a rin thu a sawi. A Twtter account chu @luwangstrela a nih thu leh, a hminga account dang awmte chu a hriatpui loh thu a sawi. 

Femina Miss India 2023 thlanna chu April thla khan Manipur-ah neih a ni a, buainain a zui. Tun hnaiah Meitei leh Tlang mite inkarah buaina nasa tak a chhuak a, chi leh chi inkara buaina a nih vanagin boruak a sosang hle. 

Hetiang karah hian social media lamah thu dik tawk lo thehdarh a hluar hle a, Manipur nula Strela Luwang hminga Twitter account siamtute pawhin hei hi remchangah hmangin post an siam. Twitter chuan he account (fake) hi an suspend a, Strela Luwang account (official) erawh suspend a ni lo.