ZALEN, Nov. 6, 2024: Cricket Association of Mizoram (CAM) chuan 2024-25 season chhungin khelmual puitling an neih chhun, Sihhmuia Suaka Cricket Ground thuam thar zelna atan Rs. Vbc 17.5 a ruahman.

Thawhlehnia CAM rorelna sang ber, Annual General Meeting (AGM) vawi 6-na chuan season thara an pawl budget atan Rs Vbc 30 an pawm a. A zahve aia tam, Rs. Vbc 17.5 zet chu hmasawnna ruhrel atan an dah a, hei hian an hmunhma neih thuam that zelna tur te, Sihhmui khelmuala pavillion thar sakna turte a tel.

Suaka Cricket Stadium hian hma a sawn zel a, tunah hian CAM chuan Rs. Vbc 50 dawn senna tur project pahnih hmangin a tihchangtlun hna a thawk mek a, nakuma thawh zawh an inbeisei.

June thla khan CAM Hony. President Lalrochuanga Pachuau chuan an khelmual tihchangtlun nan anmahni puala Rs. vbc 31.5 senna tur bakah India-a cricket thuneitu, Board of Control for Cricket in India (BCCI) atanga sum hmuh Rs. Vbc 18 an nei a, chumi hmang chuan hna an thawk tih chanchinbumite a lo hrilh tawh.

Suaka Cricket Ground hi a hmun petu, Lal Rotluanga pa hming chawia a hming hi phuah a ni a. Kum 2010 khan a sakna tur lung phum niin DoNER ministry atanga sum hmuh, Rs Vbc 11 hmanga bul tan a ni a, inkhelh theihna peih a nih hnuah May 23, 2014 khan CAM kuta hlan niin tun thlengin a tihchangtlun hna hi thawh niin hma a sawn zel.

Woodland Hills, Zonuama CAM rorelna sang, AGM hi hony. president-in kaihhruaiin agenda 14 awm zinga 13 chu hmalak zel tura pawmin AGM pawmpui tura chhawp chhuah subject pali an pawm bawk a. Season khat chhunga CAM hnuaia standing committee hrang hrang 11 atana chairman leh member turte ruat an ni bawk.

Season liamtaa an hruaitu leh hruaitu hlui thi pathum leh club hruaitu ni tawh leh player thite pualin sunna hun an hmang bawk.

AGM-ah hian Apex Council Member (office bearer leh councillor) mi paruk te bakah CAM hnuaia rorel thei mi 35 (full member 18 leh associate member 17 atangin aiawh pakhat theuh) an tel a, tun tumah hian chhimtu club pakhat an awm a ni.