Aizawl: Mizoram a awm ngai lo Sapthei eng ‘yellow variety’ chinna hmun Sungpuilawn khuaah Zirtawpni khan a vawi khatna atan sapthei Kut hman a ni a, kumin hian sapthei quintals 1400 vel helai hmunah hian thar beisei a ni. Suangpuilawn khelmuala saphei kut hmanna khuallian Horticulture Minister PC Lalthanliana chuan Mizoram mipui zaa sawmruk (60%) vel chu kut hnathawk an ni tih sawiin, “Kuthnathawktute tharchhuah hmanga kut siam a ni hi a ropui a, Jubilee dar vuakna chikhat a ni,” a ti. Khual zahawm AH&Vety Minister C.Ngunlianchunga chuan mi hlawhtling ni turin taimak leh teirei peih mi nih a pawimawh a ni tiin, “Thawhrimna piahah hahchawlhna a awm thin a ni,” a ti bawk. Zalen palai zawhna chhangin Horticuture thawktute chuan Suangpuilawn chhehvela sapthei eng an chintirna chhan chu a hmun lum vang te, a rah hlawk vang leh a ramin a ngeih vang a ni tih an sawi a. Mizo sapthei pangngai a dumpawl (purple variety) chu tlangram leh hmun vawt deuh ah a tha duh a, a eng chi chu chuan hnuai leh hmun lumah a tha duh niin an sawi a. A dumpawl hi May/June thla thleng vel a rah a, a eng hi July atanga October thleng a rah thei tih sawiin, “Sapthei rah hun chhung a rei hian MIFCO lam tan pawh hnathawh theih hunchhung a rei phah a, June atanga November thleng hna thawh tur an neih theih avangin a tha zawkah kan ngai a ni,” an ti. MIFCO chuan Chhingchhip-ah sapthei eng chi chu kg ah Rs.14 zelin an leisak zel tih Zalen an hrilh a, a dumpawl leina chu an la bithliah fel chiahlo nain kg ah Rs. 16/17 vel anih an ring ttih an sawi.