Uruguay striker Luiz Suarez chuan MLS panin 2024 season atan Inter Miami a zawm a, Barcelona-a a khelhpui thin, Lionel Messi, Sergio Busquets leh Jordi Alba te nên an inkawp leh dawn.

Kum 36 mi, Suarez hian Brazilian club Gremio a chhuahsan hnuah a thlawnin Miami hi a zawm a ni.

“Thian leh player ropui tak takte nen hian inhmuhkhawm leh hlan ka nghakhlel tawh hle a ni,” a ti.

Inter Miami chief business officer Xavier Asensi chuan Liverpool striker hlui an chang thei tur chu an club tan ‘hriat reng tur hun’ zinga a tel thu a sawi.

Nacional, Ajax leh Atletico Madrid tana league champion lo ni tawh, Suarez 2023 season liam taah Gremio tan Brazilian Serie A-ah vawi 33 inlanin goal 17 a thun a, pahnihna a nihpui.

A chet that avangin kum upa lam ni ve tawh mah se best player-ah thlan a ni.

Kum 2022 khan Gremio nen hian kum hnih atan inremna ziak mah se a khup hliam avang leh inkhel tura zin kual a tam em avangin season lo awm leh tur chu a tluan thei dawn lo va, inremna tawp hmain tihtawp a ni ta a ni.

A neitu zing England captain hlui, David Beckham pawh tel ve, Miami hian 2023 season chhung khan Messi bakah Busquets leh Alba te an la lut a. An thian thum puihna nen hian a club chanchina nomawi an lak hmasak ber, Leagues Cup chu August thla khan an la.

“Inter Miami nen chona thar ka hmachhawn leh tur hi ka lawm tak zet,” tiin Suarez chuan a sawi a. Bul tan vata nomawi tam tak lak a châk tawh thu a sawi.

A vanglaia striker tha ber huanga tel phak, Suarez hi Barcelona-a a khelh lai khan Messi, Busquets leh Alba te nen hian kum 2015 leh 2019 inkarah league-ah vawi li an champion hman.

Kum 2015-a Champions League leh Fifa World Club Cup-a an champion pawh khan an pali hi a thawh hlawk ber zinga mi an ni bawk.

Inter Miami hi season liam taah khan Eastern Conference-ah a hniam ber dawttu an ni.

England international hlui, Phil Neville-a kaihhruaina hnuaiah season bul chhe taka tanin Messi-a an lak luh hma, June thlaah bân a ni.