ZALEN, October 27, 2025: First half-a minute sarih lek chhungin Jason Lalawmpuia’n goal li thunin Mizoram naupangte chuan Sub Junior Boys’ National Football Championship 2025-26-a an inlan hmasak berah 13-0-in Odisha an sawp.

Punjab-in an thlen inelnaah hian Thawhtanni tlai khan Amritsar-a Mount Litera Zee School Ground-ah Mizo naupangte hian Tier 1 Group A inkhel pahnihnaah Odisha hi an hmachhawn a. Jason-a bakah hian Jacob Malsawmsanga leh Bernard Lalchhanhima ten hattrick an siam bawk.

Jason-a hian minute 29-ah a goal hmasa ber thunin minute 31, 23 leh 26-ah a thun belh bawk a. Ani hma hian minute 24-ah an Jacob-a’n goal hmasa ber a thun a, chawlhlawk hma hian Bernard-a’n Mizoram goal rukna a thun leh hman chiah bawk.

Second half-ah pawh inkhel a danglam tam lo va, Mizo naupangten inkhel thununin Abraham Malsawmhlua’n minute 50 leh 53-a a thun zawn hnuah Bernard-a’n minute 61-ah goal kuana a thun a, Zakaria Lalmuanzuala’n minute riat hnuah goal 10-na a thun leh bawk.

Hun tawp dawnah pawh Mizo naupangte an inthlahdah duh chuang lo va, goal hmahruai thuntu, Jacob-a’n minute 67 leh minute 90+4-ah thun belhin hattrick a siam zui a. Bernard-a pawhin hun tawp hma chiah, minute 90+6-ah Mizoram goal 13-na leh a hattrick siamna goal a thun leh bawk.

Sub Junior Boys’ National Football Championship 2025-26 Tier 1-ah hian group pali awmin team li zel an awm a. Mizoram hian Group A-ah Odisha bakah Manipur leh Bihar an awmpui a, inkhel hmasa berah Manipur hian Thawhlehni chawhnu khan Bihar hi 12-0-in an lo hneh tawh bawk.

Group khata awmte hi an inkhelh kual hnuah group tina a sang ber theuhvin semifinal an lut dawn a, Mizoram hian an tlang chuan Group C atanga tlang nen an insu thei dawn a ni.

Mizo naupangte hian Nilaini zing dar 09:00-ah Bihar an hmachhawn leh dawn a, Zirtawpniah Manipur nen an inkhel leh bawk ang.

Sub Junior Boys’ National Football Championship hi kum 1977 atanga khelh tan kha niin 2023-24 atanga kum 13 hnuai lam tana khelh tura tih hma zawng kha chuan kum 16 hnuai lam inelna atana hman thin a ni.