ZALEN November 5, 2023 : ZPM President Lalliansawta’n mipuiten anmahni ngaihsaktu an thlahlel tih sawiin, ZPM thli a tleh mek a, sum leh pai aiin chu thli chu a chak zawk ngei an beisei tih a sawi.

Aizawl Press Club ah thuthar thehdarhtute kawmin, ZPM president chuan, “Party-in sawrkar a siam tur a ni a, sawrkar erawh chuan mipui a ngaihsakin, mipui sawrkar a ni tur a ni,” a ti a, tunah chuan party-in sawrkar a siam a, sawrkarin party chauh a ngaihsak niin a sawi.

Party dangten BJP nena thawk dun tura an sawi chungchang pawh sawiin ZPM president chuan, BJP nena thawk dun chu tun tum inthlana an khingpui ber MNF party an nih thu a sawi a, BJP thawhpui an tum loh thu an hruaituten vawi eng emaw zah an puan tawh thu a sawi.

“ZPM hi mipui siam a ni a, vawiin dinhmun min hlangkaitu chu mipuite in ni. Nangmahni vang chauha he dinhmuna ding hi kan ni a, kan mawhphurhna leh kan danglamnate a taka tilang thei turin mipuite min chhin turin kan ngen leh che u a, ram rorelnaah Pathian ram tun dina a awm theih nan leh kalphung thar, mipui sawrkar a lo piana kan ram, kan hnam, kan sakhua humhima a awm zel theih nan bial hrang hranga ZPM candidate-te min lo vote-sak turin Zoram mipuite ka ngen che u a ni,” ZPM President Lalliansawta chuan a ti bawk.