DOWNLOAD OUR APP

Read latest news on your phone
app-store

Sum harsatna

Jul 24, 2022

Tun dinhmuna kan hmalakna leh mamawh hmasa ber tur nia lang chu sum renchemna hi Chief Minister atangin kalpui nise, a hnuaia mite pawhin an zawm ngeiin a rinawm

Tunhnaiah sawrkar laipuiin hriattirna thar ti chhuakin state sawrkar chu CSS pawi-sa te pechhuak turin a rawn hriattir a. Heng CSS sum te hi pekchhuah an nih chuan kan sum bawm ah sum a awm tlem dawn a, hei hian kan sum dinhmun pawh ti derthawngin harsatna kan tawh phah dawn niin mithiamte chuan an ngai a ni.

Kan hriat angin sawrkar laipui atang hian khawi emaw head hrang hrang atangin sum hi kan hmu thin a. Heng kan sum hmuh te hi Finance department chuan control zelin a mamawh dan ang zelin an pechhuak thin a. Hei vang hian CSS sum te pawh hi pekchhuah a ni mai thin lo a, a aia pawimawh te a awm chuan chungah te chuan lo hman hawh sak te a ni a, a hnuah rulh leh thin te a ni.

Mizoram chu kan hriat angin state intodelh lo, sawrkar laipui chawm kan ni a. Kan thawhchhuah neih ve chhun te hi a beitham em em mai a, hmasawnna leh thil liantham buaipuina atan chuan hman tlak a ni lo a ni. Hetiang state kan nih avang hian central hi kan mamawh bik a, kan intlawnsiak a ni ber a. Kan politician te pawhin 'Central a tlaktlum' nih an inchuh hial a ni.

Sawrkar laipui ruahmanna anga state sawrkar hi a kal chuan mithiamte hlauh ruk hi a thlen mai a hlauhawm ta hle a. Chuvangin sawrkar hian ngun taka ngaihtuah-in sum harsatna in mipui nawlpui a nghawng buai loh nan tun atanga lo inbuatsaih a hun ta hle.

Tuna sawrkar kalphungah hi chuan inrenchem lam a la lang lo hle niin a ngaih theih a. Sum harsatna kan hmachhawn takah chuan office expenditure, stationeries leh thildang dangah te pawh hian inrenchemna lam hawi (austerity measure) khauh taka kan kalpui a hun ta hle. Sawrkar leh sawrkar hnathawk hlawh leh inenkawlna ah hian kan budget tam ber hi a kal a ni tih hriain tan lak zual a hun ta hle. Sawrkar hnathawk te pawhin kan sum dinhmun hi hriain an hlawh leh hamthatna nawr kawngah te insum hrih se a duhawm hle.

Nakum maiah kan inthlang dawn a. Kan sawrkar hi sum enkawl kawnga hlawhchhamah mipui in an hmu anih vaih chuan sawrkar leh pawh a huphurhawm hle in a rinawm. Covid vanga sum hmuh tur kan hmuh loh thu hi sawrkar lam hian sum harsat chhanah an puh a, a dik rualin Covid vang vek hian sum engemaw zat kan hmuh loh tur kan hmu tih hi mipui te hian an hre ve tho a ni. 

Sum kan harsat thu hi sawrkar thuneitute hian sawi sawi thin mah se, inrenchemna lamah sawrkar ber hian hma a la tha tawk lo nia mipui ten an hriat tlat avang hian an beng a thlep a, sawrkar an beiseina a hlawhtling thin lo hian a ti beidawng niin a lang bawk. Tun dinhmuna kan hmalakna leh mamawh hmasa ber tur nia lang chu sum renchemna hi Chief Minister atangin kalpui nise, a hnuaia mite pawhin an zawm ngeiin a rinawm. 

Share now