Aizawl March 17, 2023 : Vawiin khan Mizo Hnam Run chhung inkhawm neih niin MNYF Vice President Zodinpuia chuan a kaihruai a, thusawitu MNYF President Dr.L.Thangmawia MLA chuan sum harsatna chu sawi harsat chawp a ni lo a ti a, Inthlan lo awm turah Congress a hlauhthawnpui thu leh ZPM kalphung thar chu beisei tur awm chuang lo niin a sawi. 

MNYF President Dr.L.Thangmawia chuan, "MNF party chu Pathian thu leh ram leh hnam innghahna hmanga din a nih avangin kalphung nghet tak nei a ni. Hun harsa vawi engemaw zah tawk mah se, Pathian-in a khai ding zel a ni. Sawrkar hmasa hnathawh bak engemaw zah MNF sawrkarin a thawk zawm a, sum leh pai harsatna kan tawh hi kan sawi harsat chawp a ni lo. A takin a harsa a ni," a ti.

Kumtawp inthlanah Congress party an nil a hlauhawm tiin MNYF President chuan, "Tunah hian Central-ah Congress hi an tho leh mai rih dawnin a lang lo va, kumin February thlaa India hmarchhak state pathum inthlannaah pawh khan Nagaland-ah Congress an Nil a, Tripura-ah seat 3 la-in Meghalaya-ah seat 5 an la pha ta tawk a ni. Kum tawp Mizoram inthlanpuiah pawh Congress hi an Nil mai ang tih hlauhthawnpui awm tak an ni," a ti. 

ZPM leh BJP chungchang sawiin, "ZPM pawh an phur phurin an phur viau a, an din hnu reiloteah rawng hrang hrangin Mizo te hmaah an in zuar. An bultannaah chuan Movement in tiin Party politics ngaihnep hmel takin bul an tan a, kalphung thar chu itawm takin, engchiah nge a nih mipui hrilhfiah si lovin an zuar mek reng a, tunah chuan an sawihnawm thin kawng kha an zawh chho leh mek zel zawk a ni. BJP pawh a rawn len chhoh tan lai 1993 pawh khan Mizoram-ah BJP din a ni a, sawrkarna a chan loh lai chuan an reh zui deuh a, tuna sawrkarna an siam ngheh hnu hian an tangmar leh ta deuh a ni," a ti.

Thangmawia chuan, "ZPM MLA te hi ZPM sawrkar kaldan tur hlimthla tilang mektu an ni a, anni atang hian kalphung thar an kalpui loh tur zia a lang mek. Val Upa Council engahmah an ngaih loh zia leh sawrkar pawh ni se kalphung hlui tho a takah chuan an kalpui dawn tih a thi beh ho atang hian a lang chho mek a, mipui sawrkar an tih fo pawh hi an MLA ten an fund an hmanna hmuh theih chinah hmuh tur a awm lo, a ti.

Dr.L.Thangmawia chuan, "Lunglei Municipal Council inthlan a awm dawn a, hnehna kan chan theihnan mahni tih theih theuh atanga theihtawp turin ka sawm che u a, Lunglei mipuite pawhin LMC dintu MNF Party hi a vawikhat nan min sawrkar tir ngei ka beisei a ni," a ti.

MNF Party chhung inkhawma hunserh hmangtu Joseph Zaihmingthanga chuan chanchintha chu champion pui tura Pathian min pek a ni a,  vawiina kan dinhmun hi en i la, ram tana beitu inti te hian party chhunga thahnemngaih dan hi Lalpa tihna hnuaiah a ni tak meuh meuh tih ngaihtuah a ngai a ni, a ti.