Aizawl February 13, 2023: ZPM chhung inkhawm vawiin khan neih leh a ni a, President Lalliansawta chuan mi thar lawmluhna hun a hmang a, thu a sawinaah Inthlanah sum hmachhuan tur an nei ve dawn lo, tiin Pathian rinchhana an kal zawk tur thu leh hei hi Kohhran hote duhdan leh an beisei dan a nih thu a sawi.

Lalliansawta chuan, “Party hrang hrang ten sawrkar tumin hma kan la a, tam takin sum hmatheh tur an neih theih laiin keini erawh chuan sum hman tur duh ang kan nei ve thei lo. ECI-in MLA inthlana sum hman theih zat a bituk cheng nuai 28 pawh hi keini tan chuan sang tak a ni. Sum hmachhuan tur kan nei ve dawn lo a, Pathian rinchhanin kan kal zawk dawn a, chu chu Kohhran hote duhdan leh min beisei dan a ni reng. Sum hmanga inleitlin tum te chuan engzat pawh thehchhuak se, keini chuan dik leh fel takin, thawhrimnain hneh kan tum dawn a ni. Chuvangin ZPM chu mite aia thawkrim leh taima kan ni tur a ni a, bianga thlantui luang chungin thawhrimnain kan hneh thei ang. Vote hmuh tam leh tlin tum nan ringawta thawkrim tur kan ni lo a, thawhrimna hmangin ram kan siam tha dawn a ni,” a ti.

ZPM President chuan, “MLA leh Corporator duhawm tak tak kan nei a, hna an thawh that zia leh an taimak zia mipuiin an hria a ni. Kum tawpah kan inthlang dawn a, mi tha tak tak kan la nei teuh a, ZPM-in ram enkawl hna a thawh hun hi mipuiin an nghakhlel tawh takzet a ni,” a ti. “Budget Session neih mekah kan MLA te an che tha hle a, mipui ai an awh zo hle. An thawhrimna leh an inpeknaah lawmthu ka sawi a, budget sawihona lamah tha taka an chet leh ngei ka ring tlat a ni,” a ti.

Sawta chuan, “Taima leh thawkchhuak hnem te hlawhchhamna ramah kan cheng mek; hmasawnna tur sum mimal kuta a luh vak vakna ramah chuan engkim mai hi mipuiten kan inchuh ruih ruih a, kan rilru a dik famkim tawh loh avangin he ram hian kalphung thar a mamawh a ni. Kan chungah Pathian a lungawi chuan, inthlanpui kan hmachhawn turah kan lamah a tang ngei ang; chutiang tur chuan mipuite hian kan zir phawt a ngai a, ‘Ram chu Lalpa ta’ a nih angin, a chhunga  chengte hian Pathian hriatna tak tak leh a thu zawm kan mamawh a, malsawm tlaka kan khawsak a ngai a ni,” a ti bawk.