ZALEN September 22, 2024 : Aizawl khawpui chhung traffic enkawlna felfai leh tha zawk a awm theihna tur atana ruahman, Adaptive Traffic Control System (ATCS)/Pelican Crossing, Rs. Nuai 61 chuang senna chu hman theiha ngaih a ni lo a, hmun thenkhata mi phei chu lak thlak a ni tawh.

ZALEN thudawn danin ATCS/Pelican Crossing, traffic signal light (a sen, a eng leh a hring) hmanga lirthei tlan dan enkawlna tur hi Aizawl Smart City Ltd.-in traffic police kuta an hlan hnuin vawi eng emaw zat enchhin a lo ni tawh a, signal nihphung pawh inzirtirna tihchhuah a lo ni tawh thin.

Hetihlai hian ATCS/Pelican Crossing hi Aizawl khawpui chhungah chuan hman hleih theih ni loa ngaih a ni a, enchhinna neih hnuhnung ber, November 2023-a neih bak enchhin chhunzawm a ni tawh lo.

Hemi avang hian Aizawl khawpui chhunga ATCS bun thenkhatte phei chu lak thlak a ni tawh a, hman zui chhunzawm tumna a awm tawh lo nia thudawn a ni.

ZALEN RTI zawhna, UD&PA department SPIO-in a lo chhan tawh danin Aizawl Smart City Ltd. hnuaia Pelican Crossing siamna atan hian Rs. 61,71,872 ruahman a ni a, sumte hi Ministry of Housing & Urban Affairs, Govt. of India (90%) leh Mizoram sawrkar (10%) atangin hmuh a ni.

Pelican Crossing hi Chanmari West, Millenium Centre, Civil Hospital, AR Ground gate, Israel Point, Police Station Babutlang leh Bawngkawnah pakhat theuh leh Treasury Square-ah pahnih dah a ni a, a siamtu company chu M/s Innovation, East Shalimar Bagh, New Delhi an ni a, hmanruate hi contractor supply a ni.

Aizawl Smart City Ltd.-in February 9, 2020-ah traffic police kuta an hlan hnuah July 17, 2020-ah khatihlaia UD&PA minister, Tawnluia chuan a hawng a ni.