Aizawl: Rullam-Aizawl service maxi cab chu Zirtawp tlai dar 5 pelh hret khan Aizawl pana a tlan chu Keifang atanga km 7 velah chesualin kawngthlangah metre 40 vel a lum a. Thi an awmlo nain mi 9 in hliam an tuar a, hliam tuarte hi Aizawl Civil Hospital panpui an ni a, ngaihtuahawm lutuk an awm lo. Keifang atanga thudawn danin maxicab-ah hian driver telin puitling 10 leh naupang 8 an chuang a. Lirthei hi kawngkuala a tlan chu kual zo lovin kawnthlangah a let a, a lum zel tur chu thingkung in a lo dang a ni. He chetsualna a hliam te hi Saitual damdawiin panpui phawt an niin an zinga 6 chu Aizawl Civil Hospital panpui leh an ni a, an zinga mi Victor Vanlalduhsaka (7) hi a ban vei lam hmun hnihah a tliak a, midang chu na zual leh ngaihtuahawm lutuk an awm lo niin an sawi. Sumo hi Thankhuma Rullam khaw ta a ni a, Lallawmpuia Rullam khua in a khalh a ni.