Aizawl; Zirtawp zinga Sairang thlang Buichali lei bula Maxi cab chesuala mi pathum chin hriat lohte ruang zawn hna chu nimin thleng khan ngawrh taka thawh chhunzawm zel a ni a, he thu buatsaih lai thleng hian ruang hi hmuh an la ni lo. Ruang zawn hna hi Sairang, Sairang Dinthar, Sihhmui, Lengpui, Mualkhang leh Khamrang YMA ten an thawk mek a. Buichali lei bulah Sairang Dinthar YMA te an awm a, Khuangchera kai ah Lengpui, Pawlhrang kai ah Khamrang leh Mualkhang ten an chang a, Durlui kai ah Sairang leh Sihhmui Branch YMA te an awm bawk. Tlawng lui ah hian tui a tam em avangin ruang zawn hna pawh hi duh angin a thawh theih loh a, ruang te hi ni 2/3 hnuah chuan a rawn lang chhuak mai tura rin a ni a, hei hi uluk takin an thlithlai mek a ni. Sumo chesual AS 10/C-4564 hi Patharkandhi leh Saiha inkar service a niin a neitu chu Rahul Ahmed, Patharkandhi, Karimganj, Assam a ni a. Motor ah hian driver tiamin mi 8 an chuang a, Ningani tlai dar 5 khan Patharkandhi atanga rawn chhuakin Kawnpui leh Khamrang inkar kawng block vangin darkar 1 vel chawlin an muhil a, kawng a tlang hnuah Aizawl lam pana an rawn tlan chu Buichali atanga Sairang lam metre 300 velah kawng thlangah a tlanliam a, an zinga 1 chu lui thleng lovin a vawrh chhuak a, midang 4 chu lui atangin an inham chhuak a, driver Samsul leh second driver Mintu, Patharkandhi mi ve ve leh Silchar atanga chuang mipakhat a hming hriat lohte chu motor hian li ah pilpui ta a ni. He sumo chetsual chhan hi driver mutthluk vang anih rin a ni a, kawng sir a dai thui hle a, hliam te zingah hian an tlak lai hria an awm lo a, an mu thlu vek niin an sawi.