IPL 2021 League match zirtawpni zana khelhah Mumbai Indians chuan run 42 zetin Sunrisers Hyderabad an hneh a, Kolkata Knight Riders aiin an run rate a chhiat vangin playoff an khel phak dawn lo. Inkhelh dangah Royal Challengers Bangalore-in hmahruaitu Delhi Capitals chu wicket 7-in an hneh bawk. 

Champiopn rinkai inkhelah hian Royal Challengers Bangalore chu toss-ah chak zawkin an vawm hmasa a, Delhi Capitals hian run 164 siamin wicket 5 an hloh. Delhi lamah hian chetha fal awm lovin half century siam phak pawh an awm lova, a siam tam ber Prithiv Shaw-a’n ball 31 atangin run 48 a vaw chhuak. Delhi run 164 chu Royal Challengers ten um phak tumin an batve leh a, Royal Challengers Bangalore hian wicket 3 chauh hlohin over 20-ah run 166 siamin an  target an phak a, wicket 7-in hnehna an chang. Bangalore tan Srikar Bharat chu chetha berin ball 52-ah run 78 a vaw chhuak a, Glenn Maxwell-a pawhin run 51 a siam. 

A lehlam inkhel-ah Mumbai Indians chuan run 235 siamin wicket 9 an out a, toss a chak zawk Mumbai Indians-in an vaw hmasa a, Mumbai tan Ishan Krishan a che tha hle a, ball 32 lek atangin run 84 a vaw chhuak thei a, Suryakumar Yadav pawhin ball 40 atangin run 82 a vaw chhuak bawk. Midang an chetha lutuk lo. Target huphurhawm tak umin Sunrisers an rawn ding chhuak a, mahse, an batsman ten beisei an phak lo. Wicket 8 hloh-in run 193 chiah an siam hman tihin over a zo a, run 42-in an target an phak lo. Sunrisers tan hian Manish Pandey chuan ball 41 atangin run 69 a vaw chhuak a. a ni bakah hian Jason Roy, 34 run leh Abhishek Sharma, run 33 siam te chu a chetha deuh an ni mai. 

Delhi Capitals hian point 20 neiin table chung berah an awm a, point 18 neitu Chennai Super Kings leh Royal Challengers Bangalore te an dawt. Palinaah hian Kolkata Knight Riders leh Mumbai Indians ten point 14 ve ve an a, net run rate nei tha zawk Kolkata ten playoff an khel ang. 

Vawiin hian qualifier 1 khelh turah pakhatna Delhi Capitals leh pahnihna Chennai super Kings an inhmachhawn ang a, Eliminator-ah pathumna Royal Challengers Bangalore leh palina Kolkata Knight Riders an intum thung dawn a, a chak lo zawk hi an tla ang. Qualifier 2 chu October ni 13-ah an khel leh ang.