Zaithiam tan chuan Super Bowl half-time show-a inlan thei nih hi inchhuanna tham a tling - Barbadian singer Rihanna hian Super Bowl 2023-ah headline a chang dawn e. Super Bowl hi nakkum February khian Arizona-ah khelh a ni ang. 

Pop superstar Rihanna hian Super Bowl half-time show-a a inlan tur thu hi Twitter kaltlangin a tarlang a, NFL lam pawhin Pathianni khan official-in an puang. Headline chang thei tur zingah hian - Dr Dre, Snoop Dogg, Eminem, Mary J Blige leh Kendrick Lamar te hming pawh a lang a, a tawpah Grammy Award vawi kua lai dawng tawh Rihanna an thang ta a ni. 

Super Bowl half-time show hi entu an thahnem thin hle a, National Football League (NFL) final ni mah se chawlh lawk laia an show hian ngaihven a hlawh thin hle. Minute 14 chhung rimawi hmangin ennawm ropui chhawpchhuah thin a ni a, mi maktaduai 100 chuangin an en thin a ni. 

Kum 34 mi Rihanna hi kum 2019 khan Super Bowl-a inlan tur hian sawm a lo ni tawh a, mahse a hnar. A hnar chhan hi NFL star Colin Kaepernick-a'n inkhelh hmaa vunrawng inhmuhsitna a duh loh zia lantira a thingthit avanga he game khelh thei lo tura hrem a tawh vang nia tarlan a ni. Hetih hun lai hian khawvel huapa zaithiam lar ber berte chuan Super Bowl-a inlan hi an duh lo a, boruak pawh an nei hat a nih kha.