Mizoram Armwrestling Supermatch main event-ah Denic Lalruattluanga leh Benjamin Lalawmpuia an intawng dawn.

Ningani zan hian Tlangnuam Community Hall, Aizawlah zan dar 8-ah show tan a ni dawn a, LPS 1-ah live-a pek chhuah a ni ang.

ITI Veng inelh chak, Ruattluanga’n Mizo armwrestler-ten India ram an thunun hneh viau tih a sawi a, amah hian India rama ngaihhlut hlawh, Sheru Classic-ah chak ber nihna, champion of champions title a kawl mek.

Indian Armwrestling Federation (IAF) buatsaih national championship-ah a bitum tur, Opa chak ber ve thungin champion of champions a ni mek.

Feet nga leh inchi 11-a sang, kg 83-a rit, Ruattluanga’n amah aia inchi hniha hniam, kg 101-a rit, Opa, Luangmual nena an intawnna tur chu India rama chak ber zawnna ang hial niin a sawi a, “A hmuhnawm dawn hle a ni,” a ti.

April khan Mizo pa tea rual inelh chak tan Supermatch hmasa ber huaihawt a ni tawh a, tun tumah hian pa lian pariat an tel dawn a, inelh vawi li awmin tum thum inelh thlep hmasa zawk an chak zel ang.

Tun hnaia India leh Bangladesh inelna kg 75 huanga gold medal latu, VL Zothansanga, Khatla leh 2019 National Championship kg 75-a pakhatna, Jeptha Lalthaa, Thuampui an intawng dawn.

2021 Mizoram champion of champions Vanlallura, Tlangnuam leh 2022 All India Police Meet champion of champions C Lalnunpuia, Lunglei Venglai an inhmachhawn bakah, 2022 All India Police Meet kg 110 champion Ngurthanzauva Sailo, Khatla leh kumin National Championship kg 75-a gold medal latu, Laldingliana, Tlangnuam an inelh ang.

Supermatch buatsaihtu, Westend Event Management chuan a ngaihventen an ngaihlu a, Rs 100 man ticket siamin a hmunah 50 atanga 70 vel bak hralh tur a awm tawh dawn lo tih an sawi.

A chak zawkin Rs 10,000 zel dawngin a chak lovin Rs 2,000 an la ang.