Aizawl March 4, 2023: Vawiin khan Health and Family Welfare Minister Dr. R. Lalthangliana chuan Association of Surgeons of Mizoram, 3rd Annual Conference 2023, Aijal Club, Aizawl a neih chu a hmanpui.

3rd Annual Conference puala inkhawm tawi buatsaih ah hian Health and Family Welfare Minister chuan thu sawiin he conference-a a tel thei chu lawmawm a tih thu a sawi a, Association member kalkhawmte chu  duhsakna a hlan.

Health Minister chuan Mizoram chu medical lamah hma kan sawn zia sawiin Cancer Super Speciality Hospital chu JICA puihna a sak tan a nih tur thu a sawi. Primary health care pawimawh na pawh sawiin Sub Center te tih changtlun (upgrade) chhoh zel a nih thu leh Health clinic pawh Mizorama thingtlang khaw 200 chuang Health workers te enkawlna hnuai ah din a ni a ti bawk.

Dr. R. Lalthangliana chuan tun hnaiah mizo doctor super specialist an awm ta nual chu lawmawm a tih a sawi a, kalkhawmte zinga mi tun hnaia Cancer surgery Superspecialist zo thar Lalchhandami Colney chu a lawmpui thu sawiin Doctor kalkhawmte chu zirna leh thiamna sang zawk hmu turin a fuih bawk.

3rd Annual Conference ah hian Dr. R. Tlangkunga  hriatrengna pual (oration) buatsaih a ni a, hei hi Mizoram-a Oration hman hmasak ber ani bawk. ASM Vice President Dr ST Lalruatfela chuan inkhawm a kaihruai a, Prof. Sandeep Kumar, Editor in Chief, Indian Journal of Surgery chu Speaker a rawih niin 'My tryst with benign breast disease' tih topic hmangin lecture a pe a ni.

Association of Surgeons of Mizoram hi 2018 khan din niin tun dinhmun ah member 41 an awm a, heng zinga 4 hi hmeichhe surgeon an ni. Kum hnih kalta chhung khan Lunglei-ah Free surgical Camp vawikhat buatsaih tawh in ZMC-ah Free Surgical Oncology Camp an buatsaih tawh bawk a ni.